فایلی خەڵک؛ ژمارەیەک شێفی نێودەوڵەتی بۆ ئاڤا؛ ڕێگریمان لێدەکەن

ئاڤا نیوز

ژمارەیەک شێفی کوردستان کە بە شێفی نێودەوڵەتی دەستنیشانکراون و لە پێشبڕکێ جیهانییەکان نوێنەرایەتی هەرێمی کوردستان دەکەن، ئەو شێفانە گلەیی لە تیمی کوردستان و عێراق دەکەن بەوەی ڕێگرییان لێدەکرێت بەشداری بەرنامە تەلەفیزیۆنییەکان بکەن، هەر کەسێکیش بەشداری بکات بە 25 ملیۆن دینار سزا دەدرێت.

وێنە گەورەکە: دوو مانگ پێش ئێستا ڕێكخراوێك بە ناوی ماڵی شێفەكانی كوردستان بە هاوكاریی رێكخراوی ماڵی بەغدا بۆ گەشەپێدان، پێشبڕكێیەكیان بۆ 400 شێف لە سەرتاسەری عێراق كرد و لە ئەنجامدا 20 شێف دەستنیشان كران کە  11 کەسیان كورد و نۆیان کەسیشیان عەرەبن، ئەو 20 کەسە گرێبەستیان پێكرا و بەڵێننامەیان پێ پڕكرایەوە كە ببن بە شێفی تیمی كوردستان و عێراق، بۆ ئەوەی بەشداریی لە پێشبڕكێیە نێودەوڵەتییەكان بکەن.

ئەوەی پێویستە بیزانیت: ئەو شێفانە گلەیی ئەوەیان هەیە، ئێستا ناتوانن بە ئارەزووی خۆیان ڕێکلام بکەن، ناتوانن بەشداری بەرنامە تەلەفیزیۆنییەکان بن، ئەوەی لە هەر بەرنامەیەکی تەلەفیزیۆنی دەربکەوێت 25 ملیۆن دینار سزا دەدرێ.

ئەمەش بزانە: لەکاتی ئیمزاکردنی گرێبەستەکەیان کۆمەڵێک بەڵێنیانیان پێدراوە، بەڵام هیچیان بۆ نەکردوون.

لێدوانی فەرمی:  شێف ئەنمار، سەرپەرشتیاری تیمی شێفەكانی عێراق و كوردستان بۆ ئاڤا دەڵێ: ئێمە بەزۆر گرێبەستمان بە هیچ شێفێک نەکردووە و دەبێت پابەندی گرێبەستەکەشیان بن.

- بەڕێوبەرایەتیی گشتی گەشتووگوزار ئاگاداری ئەم بابەتەیە و مۆڵەتمان لەوان وەرگرتووە.

- ڕێگریش نین لەوەی ئەو شێفانە کە ڕێکلام بۆ خۆیان بکەن،  بەڵام بەر لە چوونیان بۆ هەر بەرنامەیەکی تەلەفیزیۆنی یان بەشداریکردنیان لە هەر ڕێکلامێک، دەبێت ئێمە ئاگادار بکەنەوە، بۆئەوەی بزانن ئێمە ڕازین یان نا، هەروەها ڕێکلامیش بۆ چی دەکەن.

لەلایەکی دیکەوە : سیروان تۆفیق، بەڕێوەبەری بەبازاڕکردن لە دەستی گشتیی گەشتوگوزاری هەرێمی کوردستان بە ئاڤا میدیای ڕاگەیاند، "بەڵێ ئێمە ئاگادارین و ڕەزامەندیش بووین لەسەر پێکهێنانی تیمی شێفەکان، هەروەها ئێمە لەگەڵ ئەوەین لەمەودوا کاری ئەو شێفانە ڕێکبخرێتەوە، کەسێک کە نوێنەرایەتی وڵاتێک دەکات، نەچێت ڕێکلام بۆ لەفەیەکی سەر عارەبانە بکات".

- ناوەڕاستی ئەمساڵ ئەو تیمە بەشداری لە پێشبڕکێی نێودەوڵەتی دەکەن، هەر کەسێک لە ئەندامانی تیمی کوردستان و عێراق بە ناوەڕۆکی گرێبەستەکە ڕازی نییە، با هەڵیبوەشێنێتەوە و هیچ پارەی وەک غەرامە لێ وەرناگرین، بە زۆر گرێبەست بە کەس نەکراوە.