پارێزگای هەولێر ئامارەكانی تایبەت بە جەژنی ڕەمەزان ئاشكرا دەكات

ئاڤا نیوز

نووسینگەی پارێزگای هەولێر ڕایدەگەیێنێت كە پلانی ڕۆژانی جەژنی ڕەمەزان. وەکو خۆی و بە سەرکەوتوویی و بەبێ گرفت جێبەجێ كرا، هاوكات ئامارەكانی تایبەت بە سێ ڕۆژەكەش ئاشكرا دەكات.

وێنە گەورەكە: دامودەزگا پەیوەندیدارەكانی هەولێر بە سەرپەرشتیی پارێزگای هەولێر پلانیان بۆ سێ ڕۆژی جەژنی ڕەمەزان دانا و بەپێی ڕاگەیێنراوی نووسینگەی پارێزگاش پلانەكە بە تەواوی سەركەوتوو بووە.

ڕاگەیێنراوی فەرمی: پارێزگای هەولێر ڕایگەیاند: بەپێی ئەو ئامادەکاری و پلانانەی بۆ سێ ڕۆژی جەژنی ڕەمەزانی پیرۆز، لەلایەن لیژنەى ئەمنیى پارێزگای هەولێر بەسەرپەرشتی پارێزگاری هەولێر، بەمەبەستی پاراستنی ئارامی و ئاسایش شار و سەر و ماڵ و سەلامەتیی گیانی هاووڵاتیان، ئامادەکاری بۆ کرابوو، پلانەکە وەکو خۆی و بە سەرکەوتوویی و بەبێ گرفت جێبەجێ کرا.

ژمارەكان وادەڵێن: بەپێی ڕاگەیێنراوەكەی پارێزگای هەولێر ئامارەكانی ڕۆژانی جەژنی ڕەمەزان بەم شێوەیە بوون:

٠ ژمارەی ئەوانەی تەنیا لە ڕۆژانی پشووی جەژن سەردانی هەولێری پایتەختیان کردووە بریتی بووە لە  76 هەزار و 654 گەشتیار.

٠ لە سێ ڕۆژی جەژن، 28 تاوان، لەلایەن پۆلیسی تاوان تۆمارکراون و هەر 28 تاوانەكەش ئاشكرا كراوە.

٠ چوار ڕووداوی هاتووچۆ ڕوویانداوە و 12 كەس بریندار بوونە.

٠ نۆ حاڵەتی ئاگركەوتنەوە تۆمار كراون و هیچ زیانێكی گیانیان لێ نەكەوتووەتەوە.

٠ پێنج هەزار و 874 كەس سەردانی نەخۆشخانەکانی سنووری پارێزگای هەولێریان کردووە و 119 منداڵ لەدایك بوونە، 71 کوڕ و 48 کچ، هاوكات 669 نەشتەرگەریى جۆراوجۆر ئەنجام دراون.

٠ شەش هەزار و 956 تۆن زبڵ و پاشماوە لە سنووری سەرۆکایەتیی شارەوانی هەولێر کۆکراوەنەتەوە.