سەدان گەشتیاری بیانی بۆ بەسەربردنی پشووی جەژن هاتوونەتە هەولێر

 

ئاڤا نیوز

لە ماوەی سێ ڕۆژی جەژنی ڕەمەزانی پیرۆزدا هەزاران گەشتیار لە ڕێگەی وشکانی و ئاسمانی هاتووەنەتە هەرێمی کوردستان و لە ناوچە گەشتیارییەکاندا ماونەتەوە، ڕێژەی گەشتیاری بیانیش ڕۆژ دوای ڕۆژ زیاتر دەبێت، لە ماوەی ئەو سێ ڕۆژەدا لە هەولێر سەدان گەشتیاری بیانی تۆمارکراون.

وێنە گەورەکە: كەرتی گەشتوگوزار لە سەردەمی كابینەی نۆیەمدا پێشكەوتنی زۆر گەورەی بەخۆیەوە بینیوە، كەرتی گەشتیاری بووەتە سەرچاوەی داهات بۆ هەزاران كەس، ئێستا هەرێمی کوردستان لە شەوێكدا توانای لەخۆگرتنی نزیكەی 100 هەزار گەشتیاری هەیە.

لێدوانی فەرمی: نەریمان فازڵ، بەڕێوەبەری راگەیاندنی بەڕێوەبەرایەتیی گشتیی گەشتوگوزاری هەولێر بە ئاڤای گوت، "ژمارەی ئەو گەشیارانەی تەنیا لە ڕۆژانی پشووی جەژن سەردانی هەولێری پایتەختیان کردووە بریتی بووە لە  76 هەزار و 654 گەشتیار، 10%ـی ئەو ڕێژەیە لەڕێگەی وڵاتانی تورکیا و ئێرانەوە هاتوونەتە هەرێمی کوردستان."

ئەمەش بزانە: هەرێمی كوردستان خاوەنی 480 هۆتێل و 282 مۆتێل و هەزار ڕێستورانت و چێشتخانە و 700 كافتریا و 44 كۆمەڵگەی گەشتیاری و 500 كۆمپانیا و نووسینگەی گەشتیارییە.