ئەڵمانیا و ئوردن داوای ڕاگرتنی ‌هێرشەکان بۆ سەر کەرتی غەززە دەکەن

ئاڤا نیوز

لە کۆنگرەیەکی ڕۆژنامەوانیدا، هەریەکە لە ڕاوێژکاری ئەڵمانیا و شای ئوردن جەختیان لە پەیڕەوکردنی ئاگربەست لە غەززە کردەوە و داوایان کرد هێرشەکان بۆ سەر ئەو کەرتە ڕابگیرێت.

وێنە گەورەکە: شای ئوردن بە سەردانێکی فەرمی بۆ بەشداریکردن لە سێیەمین لووتکەی جیهانی کەمئەندامان لە ئەڵمانیایە، جیا لەمەش لەگەڵ بەرپرسانی باڵای ئەڵمانیا کۆدەبێتەوە و دواتر سەردانی بولگاریاش دەکات.

لێدوانە فەرمییەکان: لە کۆنگرە ڕۆژنامەوانییەکەدا:

- ئۆلاف شۆڵز، ڕاوێژکاری ئەڵمانیا ڕایگەیاند، پێویستە سەرنج بخرێتە سەر ڕێگاکانی وەستاندنی شەڕ لە غەززە، ڕێگای دووبارە ئاوادەنکردنەوەی، هاوکات ڕێگە بە چوونە ژوورەوەی یارمەتییە مرۆییەکان بۆ ناو غەززە بدرێت.

- شا عەبدوڵڵای دووەم، شای ئوردن ڕایگەیاند، ئەوەی لە غەززە ڕوودەدات مەترسییە بۆ تەواوی ناوچەکان، هاوکات گواستنەوەی فەلەستنییەکانی بۆ شوێنی دیکە هەڕەشە لە ئاسایشی ناوچەکە دەکات.

ئەوەی پێویستە بیزانیت: دوای 57 ڕۆژ لە وەستانی هێرشەکان لە 18-3-2025، دووبارە هێرشە ئاسمانییەکانی ئیسرائیل بۆ سەر کەرتی غەززە دەستیپێکردەوە، ژمارەیەکی زۆری خەڵکی سیڤیل و بەرپرسانی حەماس بوونە قوربانی.