نەتەوە یەکگرتووەکان هێرشەکەی دهۆک ئیدانە دەکات

ئاڤا نیوز

نەتەوە یەکگرتووەکان هێرشەکەی ڕۆژی سێشەممەی دهۆکی ئیدانەکرد کە ئاهەنگێکی کریستیانەکانی بەبۆنەی سەری ساڵی "ئەکیتۆ" بە ئامانج گرت و دەستخۆشی لە دەسەڵاتدارانی هەرێمی کوردستان دەکات کە ڕاستەوخۆ "تاوانبارەکە"ـیان دەستگیرکردووە، داواشیکرد بەهەموو شێوەیەک پارێزگاری لە فرەیی پێکهاتەکان لە عێراق بکرێت.

چیرۆکی سەرەکی: ڕۆژی 1ـی نیسان لە دهۆک كەسێك هێرشی كردە سەر ئاپۆڕای بەشداربووانی ڕێوڕەسمی ئەكیتۆی كریستیانەكان و لە شوێنی ڕووداوەكە دەستگیركرا، دواتریش ئەنجوومەنی ئاسایشی هەرێمی كوردستان ڕایگەیاند، تاوانبارەکە هەڵگری بیروباوەڕی تیرۆریستیی سەر بە داعش بووە و بە ئامێرێکی تیژەوە لە ناوبازاڕ هێرشی کردووەتە سەر هاووڵاتیان و دوو کەسی بریندار کردووە.

ڕاگەیێنراوی فەرمی: دکتۆر محەممەد ئەلحەسان، نوێنەری تایبەتی سکرتێری گشتی نەتەوە یەکگرتووەکان لە عێراق لە ڕاگەیێنراوێکدا ڕایگەیاند:

٠ نێردەی نەتەوە یەکگرتووەکان بۆ هاریکاریی عێراق (یونامی) بە توندی ئیدانەی هێرشەکەی شاری دهۆکی هەرێمی كوردستان دەکات.

٠ هێرشەکە  بووە مایەی تێکدانی ئاهەنگە کولتوورییە ئاینییەکە کە وادانرابوو بەخۆشی و بەهێمنی بەڕێوە بچێت.

٠ ستایشی وەڵامدانەوەی دەستبەجێ و کاریگەرییانەی دەسەڵاتدارانی دەکەم بە یەکسەر دەسگیرکردنی ئەنجامدەرەکە.

٠ ئەم کارە تاوانکارییە هەڕەشە لە گیانی پێکەوەژیان و لێبووردەیی دەکات کە عێراقییەکان و دەسەڵاتدارانی عێراق بە وریایی کاریان بۆ دروستکردنەوە و پاراستنی کردووە.

٠ داوا لە دەسەڵاتداران دەکەین بۆ دڵنیابوون لە دەستگیرکردنی هەموو ئەوانەی کە تاوانبارن.

پشتیوانیمان بۆ کریستیانە ئاشوورییەکان لەم کاتە سەختەدا دووپات دەکەینەوە.

٠ فرەیی ئایینی و نەتەوەیی بەردی بناغەی پێکهاتەی کۆمەڵایەتیی عێراقە و پێویستە لە هەموو کاتەکاندا پارێزگارییان لێ بکرێت.