سوودانی: هەندێک لایەن دەیانویست عێراق بچێتە شەڕ و ململانێ

 

ئاڤا نیوز

سەرۆکوەزیرانی عێراق ئاماژەی بەوە دەکات، هەندێک لە لایەنەکان دەیانویست عێراق بخلیسکێنە نێو جەنگ و ململانێ کە لە ناوچەکەدا هەیە، دەشڵێت؛ مامەڵەی ژیرانەیان لەمبارەیەوە کرد و ڕێگربوون لەوەی پریشکی ئاگری جەنگ بگاتە ئەو وڵاتە.

وێنە گەورەکە: لە سەرەتای بەرپابوونی جەنگ لە غەززە و دواتر لە لوبنان و گۆڕانکارییەکانی سووریا، گرووپە چەکدارەکانی سەر بە ئێران لە عێراق سەدان هێرشی ئاسمانییان کردە سەر ئیسرائیل و هێزەکانی ئەمریکا، ئەمەش مەترسیی هێرشی ئیسرائیل و ئەمریکای بۆ سەر عێراق زیاد کردبوو و تائێستاش مەترسیی لەو جۆرە لە ئارادیە.

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق ڕایگەیاند:

٠ بە مامەڵەکردنی ژیرانە و بەرپرسیارانە توانیمان عێراق بپارێزین و ڕێگرییمان کرد لەوەی بخلیسکێینە گۆڕەپانی شەڕ و ململانێ.

٠ هەندێک لایەن دەیانویست عێراق بچێتە شەڕ و ململانێ، هەندێک هەن لەسەر گوتاری فیتنە و قەیران و پیلانگێڕییەکان دەژین، دەبێت لەمبارەیەوە هۆشیاربین، بەتایبەتی لە هەڵبژاردنەکانی داهاتوودا.

لە لایەکی دیکەوە: ئەمریکا فشارەکانی لەسەر حکومەتی سوودانی زیاتر دەکات لەپێناو کۆتایی هاتنی هەژموونی ئێران لەو وڵاتە،  بە گوێرەی ڕێکخراوی "Long War Journal"ـی ئەمریکی، ئیدارەی ترەمپ داوای دۆزینەوەی چارەسەرێک بۆ پرسی هێزەکانی حەشدی شەعبی و گرووپە چەکدارەکان دەکات.

چارەسەرەکەش لە سێ سیناریۆی جیاواز پێکدێت؛ چەکداماڵینی گرووپە چەکدارەکان، یەکخستنەوەیان بە تەواوی لەگەڵ هێزە ئەمنییە فەرمییەکان، یان هەڵوەشاندنەوەی حەشدی شەعبی وەک دامەزراوەیەکی سەربازی سەربەخۆ.