حکومەتی عێراق سەرکۆنەی هێرشەکانی ئیسرائیل بۆ سەر کەمپی ئاوارەکانی غەززە دەکات

ئاڤا نیوز

وەزارەتی دەرەوەی عێراق "بەتووندترین شێوە سەرکۆنە"ـی بۆردوومانەکەی ئیسرائیل بۆ سەر شوێنی مانەوەی ئاوارەکانی غەززە لە قوتابخانەیەک لە کەرتی غەززە دەکات.

چیرۆکی سەرەکی: ڕۆژی پێنجشەممە، سوپای ئیسرائیل هەردوو قوتابخانەی "دار ئەلئەرقەم" و "فەهد سەباح"ـی لە گەڕەکی "توفاح" لە ڕۆژهەڵاتی کەرتی غەززە بۆردوومانکرد کە ئاوارەکانی غەززەیان تێدایە، لە ئەنجامدا زیاتر لە 130 کوژراو و برینداری لێکەوتەوە. هاوکات کۆگایەکی پێداویستییەکانی پزیشکی و مرۆیی کە سەر بە ناوەندی سعوودی بۆ کلتوور و کەلەپوور بوو وێران کرد.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ڕایگەیاند: "کۆماری عێراق  بەتووندترین شێوە سەرکۆنەی هەردوو دەستدرێژیی قەوارەی زایۆنیستی بۆ سەر خاکە داگیرکراوەکانی فەڵەستین دەکات کە لە ئەنجامدا چەندین هاووڵاتیی بێ تاوان شەهید بوون".

زانیاریی زیاتر: ئیسرائیل کۆتایی بە ئاگربەستی نزیکەی دوو مانگە لە شەڕی لەگەڵ حەماس هێنا و لە 18ـی ئاداردا بۆردوومانی تووندی بۆ سەر غەززە دەستیپێکردەوە و دواتر هێرشێکی نوێی زەمینی دەستپێکردەوە، لەو کاتەوە هەزار و 249 کەس گیانیان لەدەستداوە و سێ هەزار و 22 کەسیش برینداربوونە، بەمەش ژمارەی کوژراوانی غەززە لە 2023-10-07ـەوە گەیشتووە 50 هەزار و 609 کەس و 115 هەزار و 63 کەسیش برینداربوونە.