وەزیری بەرگریی ئەمریکا نەخۆشخانە جێدەهێڵێت

 

ئاڤا دیجیتاڵ

 

بەگوێرەی راگەیەنراوێکی وەزارەتی بەرگریی ئەمریکا، لۆید ئاوستین، وەزیری بەرگریی ئەو وڵاتە، کە بەهۆی نەخۆشییەوە لە نەخۆشخانە خەوێنرابوو، نەخۆشخانەی بەجێهێشتووە.

 

چیرۆکە سەرەکییەکە: ماوەی دوو هەفتە بوو ئاوستین لە نەخۆشخانە خەوێندرابوو، بەڵام لە سەرەتادا هەوڵی شاردنەوەی دەدرا، ئەمەش بووە هۆی ئەوەی ژمارەیەک لە ئەندامانی کۆنگرێس رەخنە لە ئیدارەی جۆ بایدن بگرن، تەنانەت هەندێکیان گوتیان گومانیان هەیە لەوەی ئاوستین بتوانێت لەبەر نەخۆشییەکەی کارەکانی ئەنجام بدات، بەڵام بایدن رەخنەگرانی بە دادوەریکردنی هەڵە تۆمەتبار کرد.

 

ئەوەی پێویستە بیزانیت: ئاوستین دوچاری شێرپەنجەی پرۆستات بووە، بەهۆیەوە رۆژی یەکی کانوونی دووەمی ئەمساڵ لە نەخۆشخانە خەوێندرا. نەخۆشییەکەی ئاوستین دەستنیشانکراوە و بەگوێرەی راگەیەنراوەکەی وەزارەتی بەرگری، جگە لە چاودێریی بەردەوام پێویستی بە چارەسەری زیاتر نییە.

 

زانیاری زیاتر: لە بەیاننامەکەی وەزارەتی بەرگریدا ئاماژە بەوە دراوە، ئاوستین لەسەر راسپاردەی پزیشکەکانی نەخۆشخانە بەجێدێڵێت، دەچێتەوە ماڵەکەی خۆی و تا بەتەواوی تەندروستی بۆ دەگەڕێتەوە لە دوورەوە کارەکانی ئەنجام دەدات. هاوکات ئاوستین لە بەیاننامەیەکدا رایگەیاندووە، لە ماڵەوە کارەکانی ئەنجام دەدات و پەرۆشە بۆئەوەی هەرچی زووە بتوانێت بگەڕێتەوە بۆ پێنتاگۆن.

 

شۆکی هەواڵەکە: رۆژی یەکی کانوونی دووەم ئاوستین لە نەخۆشخانە خەوێندرا. بەڵام تا دوای چوار رۆژ، واتە تا ٥ی کانوونی دووەم، نەخۆشکەوتنەکەی بە شاراوەیی هێڵدرایەوە و رانەگەیێنرا.

 

داهاتووی پۆستەکە: سەرەڕای داواکاری بۆ دەستلەکارلێشانەوەی وەزیری بەرگریی ئەمریکا، بەڵام کۆشکی سپی رایگەیاندووە هیچ پلانێکی بۆ لادانی ئاوستین لە پۆستەکەیدا نییە.

 

وێنەیەکی گەورەتر: نەخۆشکەوتنی وەزیری بەرگریی ئەمریکا لەکاتێکدایە،  وڵاتەکەی رێبەرایەتیی هێرشی سەر حوسییەکانی یەمەن و، چاودێریی شەڕەکانی ئیسرائیل و حەماس و هەروەها رووسیا و ئۆکراینا دەکات. ئەمە جگە لەو نائارامییانەی بە هۆی شەڕی نێوان ئیسرائیل و حەماس ناوچەکەی گرتووەتەوە.