ئەمساڵ 16 كۆڵبەری ڕۆژهەڵاتی كورستان كوژراون و برینداركراون

ئاڤا نیوز

تەنها لە چارەگی یەکەمی ئەمساڵ، 34 هاووڵاتیی کورد لە ڕۆژهەڵاتی کوردستان لەسێدارە دراون، 16 کۆڵبەریش بە تەقەی هێزەکانی سوپای پاسداران کوژراون و بریندارکراون، 284 هاووڵاتیش لە شارەکانی کوردستان بەتۆمەتی سیاسی و ئایدۆلۆژی، دەستگیرکراون.

 

وێنە گەورەکە: ڕێکخراوی مافی مرۆڤی هانا، کە بایەخ بە دۆخی مافی مرۆڤ لە ئێران و ڕۆژهەڵاتی کوردستان دەدات، بەپشتبەستن بە داتای کۆکراوەی تیمەکانی لێکۆڵینەوە، ڕاپۆرتی مانگانەی خۆی بڵاوکردووەتەوە و دەڵێت، لە سێ مانگی سەرەتای ئەمساڵ جگە لە کوشتن و لەسێدارەدانی ژمارەیەک هاووڵاتی کورد، دەیان پێشێلکاری بەرامبەر خەڵکی شارە کوردییەکان کراون.

 

ژمارەکان وادەڵێن: 34 هاووڵاتیی کورد لەسێدارە دراون کە زۆربەیان بە تاوانی ماددەی هۆشبەر بووە، چوار بەندکراوی کوردیش بەهۆی ناهەمواری دۆخی ژیانیان لەنێو زیندان، گیانیان لەدەستداوە.

- 16 کۆڵبەر لەناوچە سنوورییەکانی ڕۆژهەڵاتی کوردستان لەلایەن چەکدارانی سوپای پاسداران کوژراون و بریندارکراون یاخود لەترسی گیانیان هەڵدێراون.

- 284 هاووڵاتی کورد بەتۆمەتی سیاسی و هەبوونی پەیوەندیی بە حیزبە کوردییە ئۆپۆزسیۆنەکان، دەستگیرکراون، کە 19 لە دەستگیرکراوان ئافرەتن.