بڕیارێک لەبارەی مامۆستایانی خانەنشینەوە دەدرێت

ئاڤا نیوز

ئەو مامۆستایانەی كە خانەنشین بوونە و دەستلەکارهەڵگرتنیان بۆ كراوە، بەڵام هێشتا بەردەوامن لە وانە وتنەوە، پارەی هاندانیان بۆ خەرج دەكرێت.

وێنە گەورەکە: سەرەتای ئەمساڵ ژمارەیەکی زۆری مامۆستا و فەرمانبەر بڕیاری خانەنشین بوونیان بۆ دەرچوو، بۆ دروست نەبوونی بۆشایی لە ناوەندەکانی خوێندن، بە بڕیاری وەزارەتی پەروەردە بەشێک لە مامۆستایان تا ئێستاش لە وانە وتنەوە بەردەوامن.

لێدوانی فەرمی: سەرچاوەیەك لە وەزارەتی پەروەردەی حكومەتی هەرێمی كوردستان ڕایگەیاند: ئەو مامۆستایانەی كە لە دوای 2024-12-31ـەوە خانەنشین بوونە و دەستلەکارهەڵگرتنیان بۆ كراوە، بەڵام هێشتا بەردەوامن لە وانە وتنەوە، پارەی هاندانیان بۆ خەرج دەكرێت كە بڕەكەی برتییە لە جیاوازیی نێوان دوا مووچەی پێش خانەنشینبوون و مووچەی دیاریكراوی خانەنشینییان.

زانیاریی زیاتر: ئەگەر مامۆستایەك پێش ئەوەی خانەنشین بێت مووچەكەی ملیۆنێك بێت، بەڵام دوای خانەنشین بوون مووچەكە بووبێت بە 750 هەزار، ئەوا بۆ هەر مانگێك بڕی 250 هەزار دیناری پێدەدەرێت، واتا بە پارەی خانەنشینییەكەیەوە دەگاتەوە ئەو مووچەیەی كە پێشووتر وەری دەگرت.

سەرچاوەكە ئاشكراشی كرد كە بڕیاری خەرجكردنی پارەكە تاوەكو 31-5ـی ئەمساڵە و بڕیارەكە پەروەردەی كەركووكیش دەگرێتەوە.