سەرۆکی هەرێمی کوردستان: نێردەی تایبەتی سەرۆکی ئیماڕات بۆ وەبەرهێنان دەنێردرێتە کوردستان

ئاڤا نیوز

لە کۆنفڕاسی ئەبوزەبی بۆ وەبەرهێنان، سەرۆکی هەرێمی کوردستان بەشداری کرد و سەردانی سەکۆی "کوردستان پاڤلیۆن"ـی کرد، هاوکات لە وەڵامی پرسیارێکی نێردراوی  ئاڤا میدیادا وتی، بڕیارە ئیماڕات نێردەی تایبەتی خۆیان بۆ بواری وەبەرهێنان ڕەوانەی هەرێمی کوردستان بکەن.

 

وێنە گەورەکە: دوو ڕۆژە چواردەهەمین لوتكەی وەبەرهێنان لە ئەبوزەبی دەستیپێکردووە و ماوەی سێ ڕۆژ بەردەوام دەبێت، شاندێكی حكومەتی هەرێمی كوردستانیش بە سەرۆكایەتیی دكتۆر محەممەد شوكری، سەرۆكی دەستەی وەبەرهێنان و نوێنەری باڵای وەزارەتی بازرگانی و پیشەسازی و ژمارەیەك وەبەرهێنەر و بازرگان، لەپاڵ سەرۆك و وەزیرانی 60 وڵات لە لوتكەكە بەشدارن.

 

لێدوانی فەرمی: نێچیرڤان بارزانی، سەرۆکی هەرێمی کوردستان، لە وەڵامی پرسیاری د.مستەفا مەلا حەسەن، نێردراوی ئاڤا میدیا لە کۆنفڕاسی ئەبوزەبی وتی، لەگەڵ شێخ محەممەد بن زاید، سەرۆکی ئیمارات کۆبوونەوەیەکی دوور و درێژمان هەبوو، ئیمارات زۆر بە دڵسۆزییەوە هەوڵ دەدات ڕێگای وەبەرهێنان بۆ هەرێمی کوردستان هەبێت، بەم نزیکانە نێردەی تایبەتی خۆیان تایبەت بە وەبەرهێنان بۆ هەرێمی کوردستان دەنێرێت.

 

سەرۆکی هەرێمی کوردستان ئەمانەشی وت:

- ئێستا ئاڵۆگۆڕی بازرگانی نێوان عێراق و ئیمارات 30 ملیار دۆلارە، بەشێکی ئەو پشکە بەر هەرێمی کوردستان دەکەوێت.

- خۆشحاڵین کە دەبینن لێرە لە ئیمارات شوێنێک هەیە بە ناوی کوردستان و عێراق، دەستەی وەبەرهێنان چۆن بتوانێت وەبەرهێنەری بیانی قەناعەت پێ بکات بێن بۆ کوردستان.

- باوەڕی تەواوم بەوەیە داینەمۆی پێشکەوتنی هەر وڵاتێک کەرتی تایبەتە.

- ئەو کاتەی دەستەی وەبەرهێنانمان دروست کرد بەو ئامانجە بوو دەرفەت بدرێتە کەرتی تایبەت و وەبەرهێنەران ڕۆڵی خۆیان ببینن.

- لەو کاتەی دەستەی وەبەرهێنان دامەزراوە کوردستان زۆر پێشکەوتووە و ناکرێت ئەو پێشکەوتنانە نادیدە بگرین.

- دەبێت یاساکانی وەبەرهێنان زۆر شەفاف بن، مامەڵەکان بەشێوەیەکی خێرا بڕۆن و کەرتی بانکی بەهێز بێت.