شاندی ئیمرالی ڕاگەیێنراوێکی سەبارەت بە کۆبوونەوە لەگەڵ ئەردۆغان بڵاوکردەوە

ئاڤا نیوز

 

شاندی ئیمرالی دوای کۆبوونەوە لەگەڵ ئەردۆغان لە ڕاگەیێنراوێکدا کۆبوونەوەکە بە "ئەرێنی" ناوزەند دەکات.

 

وێنە گەورەکە: پرۆسەی ئاشتی لە تورکیا بە کۆبوونەوەی ئەمڕۆی نێوان ڕەجەب تەیب ئەردۆغان، سەرۆککۆماری تورکیا و شاندی ئیمرالی پێینایە قۆناغێکی نوێ و پەیام و دیداری عەبدوڵا ئۆجەلان، ڕێبەری زیندانیکراوی پەکەکە لەگەڵ ئەردۆغان گفتوگۆی لەبارەوە کرا، سەبارەت بە کۆبوونەوەکەی ئەمڕۆ، شاندی ئیمرالی لە ڕاگەیێنراوێکدا باس لە چاوپێکەوتنەکەیان لەگەڵ سەرۆککۆماری تورکیا دەکات و بە "قۆناغێکی نوێ" ناوزەندی دەکات.

 

بڵاوکراوەی فەرمی: شاندی ئیمرالی لە بڵاوکراوەیەکی فەرمیدا ڕایگەیاند، کۆبوونەوەکە لەگەڵ ڕەجەب تەیب ئەردۆغان، سەرۆککۆماری تورکیا لە کەشێکی ئەرێنی و بونیادنەر و هیوابەخش بۆ داهاتوو بەڕێوەچوو، لە کۆبوونەوەکەدا قۆناغەکانی داهاتووی پرۆسەی ئاشتی هەڵسەنگاندنی بۆ کرا و کۆبوونەوەیەکی بەرهەمدار بوو.

 

زانیاریی زیاتر: لە بەشێکی دیکەی ڕاگەیێنراوەکەی شاندی ئیمرالی هاتووە، "دوای ئەم کۆبوونەوەیە زیاتر هیوادارین بە سەرکەوتنی پرۆسەی ئاشتی، وڵاتەکەمان پێویستی بە چوونە نێو قۆناغی سیاسی و دیموکراسی نوێ هەیە، پێویستە قۆناغی شەڕ و ململانێ تێپەڕینین و لە ئەمڕۆ بەدواوە  بە ئیرادەیەکی بەهێزتر کار بۆ پرۆسەی ئاشتی دەکەین". 

 

ئەوەی پێویستە بیزانیت: "لە ماوەیەکی نزیکدا شاندی دەم پارتی بۆ جاری چوارەم سەردانی ئیمرالی بکەن و پەیام و ناوەڕۆکی کۆبوونەوە لەگەڵ ئەردۆغان بە عەبدوڵا ئۆجەلان بگەیەنن.