فایلی خەڵک؛ کەسوکاری توشبووانی ئۆتیزم نیگەرانن لە کەمی سەنتەرەکانی چارەسەر

ئاڤا نیوز

 

لە پارێزگای سلێمانی، دوو هەزار منداڵی ئۆتیزم هەن، کەچی  تەنیا یەک سەنتەری راهێنانی ئۆتیزم هەیە و تەنها 100 منداڵ ڕاهێنان وەردەگرن، ئەمەش دایک و باوک و کەسوکاری توشبووانی ئۆتیزمی نیگەران کردووە. هاوکات سەنتەری تالاسیمای ڕانیەش داوای بینای تایبەت دەکەن.

 

چیرۆکی سەرەکی: ئۆتیزم نەخۆشییەکی ئاڵۆزی مێشکە و بەهۆی کێشە لە کۆئەندامی دەمار ناودەبرێت بە تێكچوونی باری گەشەكردنی ئەقڵ، كە كاریگەری لەسەر مێشك دەبێت لەڕووی چالاكی كۆمەڵایەتی و پەیوەندییەكانی بەدەورووبەرەوە لە سێ ساڵی یەکەمی تەمەنی مرۆڤدا دەرەکەوێت و دەستنیشان دەکرێت.

 

لێدوانی فەرمی: بەختیار ڕەئوف، سەرپەرشتیاریی کۆمەڵەی ئۆتیزم لە سلێمانی بە ئاڤا میدیای ڕاگەیاند، سلێمانی پێوستی بە 40 سەنتەری ڕاهێنانی ئۆتیزم هەیە، چونکە لەهەر 100 منداڵی تازە لەدایکبوو، چوار منداڵیان ئۆتیزمیان هەیە.

 

-    کانی سالار، پسپۆری سایکۆلۆژی هەر لەوبارەیەوە بە ئاڤای ڕاگەیاند: پێویستە سەنتەرەکان زیاد بکرێن و گرنگی بە پسپۆری راهێنانی بواری زمانەوانی تووشبووانی ئۆتیزم بدرێت تا بتوانرێت لە قۆناغی سەرەتایی دەرکەوتنەکەی راهێنانیان پێ بکرێت و بەرەو باشتر بڕۆن.

 

بەتەنیشت ئەم بابەتەوە: سەنتەری تالاسیمیای ڕانیە سێ ساڵە کراوەتەوە، کەچی وەک میوان لە نەخۆشخانەی گشتیی ڕانیە چەند ژوورێکیان پێدراوە و بینای تایبەتیان نییە، بۆیە داوای بینای تایبەت دەکەن.

 

- بەشی ئەندازیاری تەندروستی گشتیی ڕاپەڕینیش لەوبارەیەوە بە ئاڤا میدیای ڕاگەیاند، ماوەی دوو ساڵە دەرخستەی پێویستیان کردووە بۆ دروستکردنی بینای سەنتەری تالاسیمیا و چاوەڕوانی ڕەزامەندی وەزارەتی دارایی دەکەن.