سوپای پاسداران هەولێر مووشەکباران دەکات

ئاڤا دیجیتاڵ 

 

كاتژمێر 11:30 خولەکی شەوی دووشەممە، سوپای پاسدارانی ئێران چەند هێرشێکی مووشەكی یەک بەدوای یەکی كردە سەر شاری هەولێر. هەر زوو ئەنجوومەنی ئاسایشی هەرێمی كوردستان لە ڕاگەیێندراوێكدا هەواڵەکەی پشتڕاست کردەوە.

 

چی ڕوویدا؟ شەوی دووشەممە، سوپای پاسداران چەند شوێنێکی لە نێو شاری هەولێر بە ژمارەیەک مووشەکی بالیستی یەک لەدوای یەک کرانە ئامانج. هەر هەمان شەو ئەنجومەنی ئاسایشی هەرێمی کوردستان راگەیێنراوێکی بڵاو کردەوە و گوتی: چوار کەس گیانیانیان لەدەستداوە و تەندروستیی بریندارانیش ناجێگیرە.

 

مەترسییە پێشبینیکراوەکان: وا پێشینی دەکرێت کە هێرشەکانی ئێران و گرووپە چەکدارەکانی نزیک لەو وڵاتە، بەردەوام بن و دووبارە بە مووشەک و درۆن هێرش بکاتەوە سەر هەرێمی کوردستان.

 

زیانە سەرەکییەکان: لە هێرشە مووشەکییەکدا، زیان بە چەندین ماڵی هاونیشتمانییان لە نزیک شوێنی کەوتنەخوارەوەی مووشەکەکان کەوتووە. لەو ڤیدیۆیانەشی لە نزیک شوێنی ڕووداوەکە بڵاو کراونەتەوە وا دەردەکەوێت، ماڵەکانی نزیک شوێنی مووشەکبارانکردنەکە زیانیان بەرکەوتووە. 

 

بۆچوونی لایەنی بەرامبەر: دوای چەند خولەکێک لە هێرشە مووشەکییەکانی سەر شاری هەولێر، سوپای پاسدارانی کۆماری ئیسلامی ئێران لە ڕاگەیێندراوێكدا بەرپرسیارێتیی خۆی لە هێرشەکەی سەر هەولێر ڕاگەیاند و گوتی: "هێرشەکان بە مووشەکی بالیستی ئەنجامدراون و ئەمەش وەڵامێکە بۆ هێرشی ئەم دواییەی سەر وڵاتەکەمان".

 

باکگراوند: هێرشی گرووپە چەکدارەکانی نزیک لە ئێران ماوەیە بەردەوامە و ناوە ناوە بە مووشەک و درۆن هێرش دەکەنە سەر فرۆکەخانەی نێودەوڵەتیی هەولێر و فرۆکەخانەی سەربازیی هەریر. ئەمجارەیان بە مووشەک و درۆن هێرش کرایە چەند شوێنێکی شاری هەولێر و جگە لە زیانی ماددی کە بەر ماڵی هاونیشتمانییان کەوتووە، چەند کەسێکیش بوونەتە قوربانی.