وزیری کاری لوبنان: ڕووداوەکانی سووریا هۆکاری پەککەوتنی هێڵی نەوتی کەرکووک-تەڕابلووس بووە

ئاڤا نیوز

 

وزیری کاری لوبنان دەڵێت، ڕووداوەکانی 14 ساڵی ڕابردووی سووریا هۆکاربوون کە نەتوانن هێڵی نەوتی عێراق - لوبنان (کەرکووک-تەڕابلوس) کارابکەنەوە، جەختیش دەکاتەوە کە بەغدا و بەیرووت بە ئاڕاستەی کارکردن لەسەر پڕۆژە هاوبەشەکان هەنگاو دەنێن.

 

ئەوەی پێویستە بیزانیت: هێڵی نەوتی عێراق - لوبنان (کەرکووک-تەڕابلووس) بەشێوەی ناڕاستەوخۆ لەڕێگەی هێڵی حەیفای فەڵەستین یان ڕاستەوخۆ لە ناوەڕاستی سەدەی ڕابردوەوە کارا بووە، بەڵام لە شەڕی هەشت ساڵەی ئێران و عێراق، سووریا وەک پاڵپشتییەک بۆ ئێران هەناردەی نەوتی بەو هێڵەدا ڕاگرت، بەهۆی شەڕی ناوخۆی سووریاش ماوەی ڕابردوو کاراکردنەوەی هێڵەکە وەک مەحاڵ ناودەبرا.

 

لێدوانی فەرمی: محەممەد حەیدەر، وزیری کاری لوبنان ڕایگەیاند، پەیوەندییەکانیان لەگەڵ بەغدا پتەو و بەهێزن و حکومەتی لوبنانیش کار دەکات بەمەبەستی ئاسانکاریکردن بۆ وەبەرهێنەرانی عێراقی، داواش دەکەن وەبەرهێنانی بیانیی لە لوبنان زیاد بکرێت.

 

بەشێکی دیکە لە قسەکانی محەممەد حەیدەر، وزیری کاری لوبنان:

 

- جۆزیف عۆن، سەرۆکی لوبنان پلانی هەیە سەردانی وڵاتانی عەرەبی بکات، عێراقیش لەپێشینەی سەردانەکانی دەبێت.

 

- ڕووداوەکانی ناوخۆی لوبنان و ناوچەکە، کاریگەرییان لەسەر پڕۆژە هاوبەشەکانی نێوان بەغدا و بەیروت هەبووە، ئەوەش هۆکاری دواکەوتنی کاراکردنەوەی هێڵی نەوتی کەرکووک-تەڕابلووس بووە چونکە پێویستە بە سووریادا تێپەڕببێت، ئەوەش وایکردووە جێبەجێکردنی دوابکەوێت.

 

- ئیسرائیل پابەندی یاسا نێودەوڵەتییەکان نەبووە، ئێمەش وەک لوبنان پابەندین بە یاسا نێودەوڵەتییەکان و دەرفەت بە چارەسەری دیپلۆماسی دەدەین