ئێران: گفتوگۆی "ناڕاستەوخۆ" لەگەڵ ئەمریکا دەستیپێکرد

ئاڤا نیوز

 

ئێران ڕایگەیاند، گفتوگۆی "ناڕاستەوخۆ" لەگەڵ نێردەی ئەمریکا بۆ ڕۆژهەڵاتی ناوەڕاست لە عومان لەبارەی پرۆگرامە ئەتۆمییەکەی وڵاتەکەیان دەستیپێکرد.

 

وێنە گەورەکە: ئەمڕۆ شەممە ڕێککەوتی 12ـی 4ـی 2025 شاندی دانووستاندنکاری نێوان ئێران و ئەمریکا لە مەسقەتی پایتەختی عومانن. ئامانج لە کۆبوونەوەکە گفتوگۆکردنە لەسەر بەرنامە ئەتۆمییەکەی ئێران. تاران داوای گفتوگۆی ناڕاستەوخۆ دەکات، هەرچی واشتنتە، سوورە لەسەر ئەوەی گفتوگۆکان بەشێوەی ڕاستەوخۆ لەنێوانیاندا بەڕێوەبچن.

 

بڵاوکراوەی فەرمی: دوای گەیشتنی شاندی وڵاتەکەیان بە عومان، ئێران ڕایگەیاند، گفتوگۆی ناڕاستەوخۆ لەگەڵ ستیڤ ویتکۆف، نێردەی سەرۆکی ئەمریکا بۆ ڕۆژهەڵاتی ناوەڕاست لە عومان لەبارەی بەرنامە ئەتۆمییەکەوە دەستیپێکرد.

لێدوانی فەرمی: ئەندامێکی تیمی دانوستانکاری نێوان ئێران و ئەمریکا بە ئاژانسی هەواڵی تەسنیمی ڕاگەیاند، کەشوهەوای وتووێژەکانی نێوان ئێران و ئەمریکا ئەرێنییە.

هەرچەندە هێشتا دانوستانەکان تەواو نەبوون و گفتوگۆکان بەردەوامن، بەڵام بەدووری نازانم گفتوگۆکان بۆ سبەینێ یەکشەممە درێژبکرێنەوە.