بەهۆی کەمی کارەباوە کێشە بۆ جووتیارانی گوندی باغەمرە شەهاب لە دارەتوو دروستدەبێت

ئاڤا نیوز

 

جوتیارانی گوندی باغەمرە شەهاب لە ناحیەی دارەتوو لە سنووری پارێزگای هەولێر، بەهۆی کەمی کارەبای نیشتمانییەوە ناتوانن لەسەر زەوییەکانیان بەروبوومی کشتوکاڵی بچێنن و ناشتوانن ئەو ئاوەی بۆ زەوییەکانیان پێویستە لە ڕێگەی بیرەکانەوە دابینی بکەن.

  

زانیاریی زیاتر: مام جەمال، جووتیارێکی گوندەکەیە و لەباوانیەوە پیشەی جووتیاری بۆ ماوەتەوە، هەموو تەمەنی بۆ زەوییە کشتوکاڵییەکانی تەرخان کردووە، بەڵام کەمی کاتژمێرەکانی کارەبای نیشتمانی دەست و قاچی مام جەمالی بەستۆتەوە و ناتوانێت ئاو لە بیرەکەیەوە بۆ زەوییە وشکەکەی بهێنێت. 

 

هۆکارە زانراوەکان: فراوانبوونی ناحیەی دارەتوو فشاری زۆری خستۆتە سەر کارەبای ناوچەکە، هەر بۆیە ناتواندرێ پێویستی جووتیاران لە کارەبا پڕبکرێتەوە، بەڵام بە قسەی بەڕێوەبەری فەرمانگەی کارەبای ناحیەی دارەتوو، لەم هاوینە جووتیارەکانی گوندی باغەمرە شەهاب کێشەی کارەبایان نامێنێت.

 

زانیاریی زیاتر: لە گوندی باغەمرە شەهاب 16 بیری ئاو بە کارەبای نیشتمانی کار دەکەن و سەرچاوەی دابینکردنی نزیکەی 1000 دۆنم زەوین، هاوکات بژێوی زیاتر لە 200 جووتیار و کرێکاری لەسەرە.

 

ئەوەی پێشبینی دەکرێت: دوای نزیکی پێنج ساڵ لە کێشە و گرفتی کەمی کارەبای نیشتمانی لە زەویە کشتوکاڵییەکانی گوندی  باغەمرە شەهاب، وا بڕیارە لەم هاوینە بە بڕی 470 ملیۆن دینار هێڵێکی دیکەی کارەبا بۆ بیرەکان ڕابکێشرێت و، لەگەڵ تەواوبوونی پڕۆژەی ڕووناکیش ئەو کێشەیەی جووتیارەکان بۆ هەمیشە چارەسەر دەبێت و 24 کاتژمێر ئاو دەگات بە زەوییەکانیان.