ئێران: دانووستاندنەکان لەگەڵ ئەمریکا بە ناڕاستەوخۆ بەردەوام دەبن

ئاڤا نیوز

 

دوای بەڕێوەچوونی یەکەم دانووستان لەنێوان شاندی ئەمریکا و ئێران، بڕیارە هەفتەی داهاتوو هەردوو شاندەکە دووبارە کۆببنەوە، وەزارەتی دەرەوەی ئێران دەڵێت: هەر بەهەمان شێوە 'ناڕاستەوخۆ' دانووستانەکان ئەنجام دەدرێن.

 

وێنە گەورەکە: دواجار هەڕەشە و لێدوانەکانی دۆناڵد ترەمپ، سەرۆکی ئەمریکا توانی ئێران بێنێتە سەر مێزی گفتۆگۆ، بە نێوەندگیری عومان، واشنتن و تاران لەسەر ئاستی باڵا کۆبوونەوەیەکی ناڕاستەوخۆیان ئەنجامدا، هەردوولاش کۆبوونەوەکەیان بە ئەرێنی و بەرهەمدار وەسف کرد.

 

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران لەبارەی دانووستانەکان ڕایگەیاند،'' دانووستانەکان لەگەڵ ئەمریکا لەسەر پرسی ئەتۆمی و هەڵگرتنی سزاکان بەردەوام دەبێت، دانووستانی داهاتوو بە نێوەندگیری عومان و بەشێوازی ناڕاستەوخۆ بەڕێوەدەچێت''.

 

ئەوەی پێویستە بیزانیت: 19-4-2025 جارێکی دیکە دانووستانەکانی نێوان ئەمریکا و ئێران  ئەنجامدەرێت، بەڵام بە وتەی عێراقچی، ئەگەر هەیە دانووستانەکان لە عومان نەبێت، بەڵام عومان هەر وەک ئەمجارە نێوەندگیری دەکات.