مەسرور بارزانی: پێویستە حكومەتی فیدڕاڵی ستەملێكراوانی دەستی بەعس قەرەبوو بكاتەوە

ئاڤا نیوز

سەرۆکوەزیران مەسرور بارزانی ڕایدەگەیەنێت، پێویستە حکومەتی فیدڕاڵی بە هەستکردن بە ئەرکی یاسایی و دەستووری و ئەخلاقی خۆی، کەسوکار و بنەماڵە و هەموو زیانلێکەوتووانی جینۆسایدی ئەنفال و سەرجەم ستەملێکراوانی دیکەی دەستی ڕژێمی بەعس، لەڕووی ماددی و مەعنەوی قەرەبوو بکاتەوە.

 

وێنە گەورەکە: ئەمڕۆ یادی 37 ساڵەی شاڵاوە بەدناوی ئەنفالە کە ڕژێمی بەعسی ڕووخاو دژ بە خەڵک و خاک و ژینگەی کوردستان ئەنجامیدا و لە زنجیرەیەک شاڵاوی بەدوای یەکدا دەیان هەزار خەڵکی بێتاوانی کوردستانی ڕاپێچی بیابانەکانی باشوور و ناوەڕاستی عێراق کرد و لەگۆڕی بەکۆمەڵدا زیندەبەچاڵ و بێسەروشوێنی کردن.

 

پەیامی فەرمی: لەم یادە کارەساتبارەدا، سەرۆکوەزیران مەسرور بارزانی سەرۆکی حکومەتی هەرێمی کوردستان، پەیامێکی بڵاوکردەوە و ڕایگەیاند، جێنۆسایدی ئەنفال، تاوانکارییەکی گەورە بوو لە دژی خاک و خەڵکی کوردستان ئەنجامدرا و تا ئێستاش، دەرهاویشتە و لێکەوتەکانی ئەم کۆمەڵکوژییە هەر ماون.

 

مەسرور بارزانی بە پێویستی دەزانێت، حکومەتی فیدراڵ، بە هەستکردن بە ئەرک و لێپرسراویەتی یاسایی و دەستووری و ئەخلاقی خۆی، کەسوکار و بنەماڵە و هەموو زیانلێکەوتووانی جێنۆسایدی ئەنفال و هەموو ستەملێکراوانی دیکەی دەستی ڕژێمی بەعس، لە ڕووی ماددی و مەعنەوییەوە قەرەبوو بکاتەوە.

 

ڕاشیگەیاند، حکومەتی هەرێمی کوردستان پابەندبوونی خۆی بە خزمەتکردنی زیاتری کەسوکار و بنەماڵەی سەربەرزی ئەنفالکراوان و شەهیدانی کوردستان دووپات دەکاتەوە.