لە عەلوەی هەولێر هەر کەسێک خاسی ئێرانی بفرۆشێت دوو ملیۆن دینار غەرامە دەکرێت

ئاڤا نیوز

 

بەڕێوەبەرایەتیی کشتوکاڵی هەولێر لەڕێگەی هۆبەی چاودێرییەوە عەلوەی هەولێر گەڕاون بۆ دۆزینەوەی خاسی ئێرانی، ئاگاداری بە فرۆشیارانیش دراوە سزای پێ بژاردن بۆ هەر کەسێک دەکرێت ئەگەر هاتوو بیفرۆشێت.

 

وێنە گەورەکە: ساڵانە بۆ بە بازاڕکردنی بەرهەمی ناوخۆیی، وەزارەتی کشتوکاڵی هەرێمی کوردستان بڕیاری قەدەغەی هاوردەی سەوزە و میوە دەردەکات، یەکێک لەو بەرهەمانەی بە درێژایی ساڵ قەدەغەی هاوردەی لەسەرە خاسە.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤا میدیای وت، ئەو خاسەی لە عەلوەی هەولێر هەیە لە دەروازەکانی سنووری حکومەتی عێراق بە قاچاخ هاوردە کراون. ئەمڕۆ دەست گیراوە بەسەر بڕێک خاسی ئێرانی و نێردراوە بۆ ئالیکی ئاژەڵ و ڕێگە نەدراوە بفرۆشرێت.

 

بە وتەی هێمن سەید موراد، هەموو بازرگانەکانی سەوزە و میوەی عەلوەی هەولێر ئاگادار کراونەتەوە، هەر کەسێک خاسی ئێرانی بفرۆشرێت دوو ملیۆن دینار سزای پێ بژاردنی بۆ دەکرێت.