ماکرۆن پشتگیری وڵاتەکەی بۆ هەرێمی کوردستان دووپات کردەوە

ئاڤا نیوز

لە دیدارێكدا نێچیرڤان بارزانی، سەرۆكی هەرێمی كوردستان و ئیمانوێل ماكرۆن سەرۆكی فەرەنسا، جەختیان لە پاراستنى ئارامى و سه‌قامگيريى عێراق و دوورخستنه‌وه‌ى له‌ ئاڵۆزييه‌كانى ناوچه‌كه‌ کردەوە.

وێنە گەورەكە: پەیوەندییەکانی نێوان فەرەنسا و هەرێمی کوردستان مێژوویێکی دوور و درێژی هەیە، فەرەنسا یەکێکە لەو وڵاتانەی کە بەردەوام پاڵپشتی هەرێمی کوردستان بووە.

چیرۆکی سەرەکی: پاشنيوه‌ڕۆى ئه‌مڕۆ دووشه‌ممه‌ 2025-04-14، نێچيرڤان بارزانى، سه‌رۆكى هه‌رێمى كوردستان، له‌ ڕێوڕه‌سمێكى فه‌رميدا له‌ كۆشكى ئه‌ليزێ له‌ پاريس، له‌لايه‌ن ئيمانوێل ماكرۆن، سه‌رۆكى فه‌ره‌نساوه‌ پێشوازیى لێ كرا.

ڕاگەیێنراوی فەرمی: سەرۆكایەتیی هەرێمی كوردستان سەبارەت بە ناوەڕۆكی كۆبوونەوەكە ڕایگەیاند:

٠ لە كۆبوونه‌وه‌يه‌كى دووقۆڵيدا، نێچیرڤان بارزانی و ماكرۆن پته‌وكردنى په‌يوه‌ندييه‌كانى فه‌ره‌نسايان له‌گه‌ڵ عێراق و هه‌رێمى كوردستان و فراوانكردنى هاريكاريى هاوبه‌شى نێوانيان تاوتوێ كرد، سەرۆكی هەرێمی كوردستان سوپاس و پێزانينى بۆ پشتگيريى به‌رده‌وامى فه‌ره‌نسا و سه‌رۆك ماكرۆن له‌ عێراق و هه‌رێمى كوردستان، دووپات كرده‌وه‌.

٠ جه‌ختيان له‌ خواستى دوولايه‌نه‌ بۆ بره‌ودانى زياتر به‌ په‌يوەندييه‌كان له‌ هه‌موو بواره‌كاندا كرده‌وه‌، هه‌روه‌ها‌ هه‌ردوولا هاوڕا بوون له‌سه‌ر گرنگيى پاراستنى ئارامى و سه‌قامگيريى عێراق و دوورخستنه‌وه‌ى وڵات له‌ ئاڵۆزييه‌كانى ناوچه‌كه‌.

٠ له‌ ته‌وەرێكى ديكه‌ى كۆبوونه‌وه‌كه‌دا، ده‌رباره‌ى دوايين پێشهاته‌كانى ڕۆژهه‌ڵاتى ناوه‌ڕاست، دۆخى سووريا و مه‌ترسييه‌كانى تيرۆر و به‌رده‌واميى هه‌ڕه‌شه‌كانى داعش، بيروڕايان گۆڕييه‌وه‌. هه‌ردوولا داكۆكييان له‌ گرنگيى مسۆگه‌ركردنى مافه‌كانى كورد و پێكهاته‌كان له‌ سووريا و گفتوگۆ و لێكگه‌یيشتن بۆ چاره‌سه‌ركردنى ئاشتييانه‌ى كێشه‌كان له‌ ناوچه‌كه‌‌، كرده‌وه‌.