نێچیرڤان بارزانی: ئه‌ركى هه‌موو لايه‌كمانه‌ ئه‌وپه‌ڕى خزمه‌تى هه‌ڵه‌بجه‌ بكه‌ين

ئاڤا نیوز

سەرۆكی هەرێمی كوردستان بە بۆنەی دەنگدان لەسەر پڕۆژە یاسای بەپارێزگابوونی هەڵەبجە لە پەرلەمانی عێراق پەیامێكی پیرۆزبایی بڵاوكردەوە و لەمیانەدا دەڵێت، ئه‌ركى هه‌موو لايه‌كمانه‌ بێ درێغيكردن، ئه‌وپه‌ڕى خزمه‌تى هه‌ڵه‌بجه‌ بكه‌ين.

چیرۆكی سەرەكی: دوای 10 ساڵ لە دواخستنیی بە هۆکاری جۆراوجۆر، ئەمڕۆ پەرلەمانی عێراق کۆبووەوە و دەنگیدا لەسەر یاسای بەپارێزگابوونی هەڵەبجە.

بڵاوكراوەی فەرمی: نێچیرڤان بارزانی، سەرۆكی هەرێمی كوردستان لە پەیامێكیدا ڕایگەیاند: به‌ گه‌رمى پيرۆزبايى له‌ خه‌ڵكى هه‌ڵه‌بجه‌ و ته‌واوى هه‌رێمى كوردستان ده‌كه‌م. سوپاس و پێزانين و ده‌ستخۆشى پێشكه‌ش به‌‌ ئه‌نجومه‌نى نوێنه‌رانى عێراق و هه‌موو لايه‌ك له‌ هه‌رێمى كوردستان و عێراق ده‌كه‌م كه‌ له‌م پرۆسه‌ درێژه‌دا هاوكار و يارمه‌تيده‌رمان بوون.

- بۆ خزمه‌تكردنى باشترى خه‌ڵكى هه‌ڵه‌بجه، ئێمه‌ هه‌ر زوو له‌ هه‌رێمى كوردستان پرۆسه‌ى به‌پارێزگاكردنى هه‌ڵه‌بجه‌مان ده‌ست پێكرد، ته‌واوبوونى ئه‌مڕۆى ڕێكاره‌كانى له‌ عێراق و به‌ فه‌رمى ناساندنى وه‌ك پارێزگا‌، كه‌مترين پاداشتى قوربانى و ئێش و ئازارى هه‌ڵه‌بجه‌ و خه‌ڵكه‌ تێكۆشه‌ره‌كه‌يه‌تى.

- ئه‌ركى هه‌موو لايه‌كمانه‌ بێ درێغيكردن، ئه‌وپه‌ڕى خزمه‌تى هه‌ڵه‌بجه‌ بكه‌ين.

باكگراوند: لە ساڵی 2014ـەوە حکومەتی هەرێمی کوردستان هەڵەبجەی بە فەرمی کردووە بە پارێزگا، بەڵام تا ئەمڕۆ، حکومەتی فیدراڵ وەک 19ـهەمین پارێزگای وڵاتەکەی مامەڵەی لەگەڵدا نەدەکرد، ئێستا دانیشتووانی هەڵەبجە بە نزیکەی 120 هەزار کەس دەخەمڵێنرێت و لەڕووی کارگێڕیشەوە لە دوو قەزا و سێ ناحیە پێکدێت.