پلاندانانی عێراق بۆ ئاڤا: پارەی بژمێرەکان بەگوێرەی گرێبەستەکانیان خەرج دەکرێت

ئاڤا نیوز

وتەبێژی وەزارەتی پلاندانانی عێراق ڕایگەیاند، پارەی هەر بژمێرێک بەگوێرەی گرێبەستی واژۆکراو لەگەڵ دەستەی ئامار خەرج دەکرێت و مافەکانیان نافەوتێت، ئەوانەشی مانگێک و چەند ڕۆژێک کاریان کردووە، پارەی ڕۆژەکانیان بەشێوەی پاداشت بۆ خەرج دەکرێت.

ئەوەی پێویستە بیزانیت: ئەمڕۆ بەشێک لە بژمێرەکان لە هەولێر و سلێمانی خۆپیشاندانیان ئەنجامدا کە وەک خۆیان دەڵێن ژمارەیان 20 هەزار کەسە، داوایان کرد مووچەی مانگی دووەم و کۆتایی ماوەی سەرژمێریی ساڵی ڕابردوویان بۆ خەرج بکرێت و وەک دەرچووی دانەمەزراویش، حکومەت دایانبمەزرێنێت.

لێدوانی فەرمی: عەبدولزەهرە هینداوی، وتەبێژی وەزارەتی پلاندانانی عێراق بە ئاڤا میدیای ڕاگەیاند، خەرجکردنی پارە بۆ بژمێرەکان بەگوێرەی ئەو گرێبەستە دەبێت کە لەنێوان بژمێرەکان و دەستەی ئامار واژۆکراوە، ئەگەر گرێبەستەکە بۆ دوو مانگ بێت مووچەی دوو مانگەکەیان بۆ خەرج دەکرێت، ئەگەریش ماوەی کارکردنی بژمێرەکە مانگێک و چەند ڕۆژێک بوو، ئەو کات مووچەی مانگەکەی بە تەواوی وەردەگرێت و ئەو ڕۆژانەشی کاریکردووە، وەک پاداشت بۆی خەرج دەکرێت.

- ئێستا سەرقاڵی چارەسەرکردنی ئەو کێشەیەن بۆ ئەوانەی مانگێکیان تەواونەکردووە تا بزانرێت چۆن بۆیان چارەسەر بکرێت، ئەویش بەشێوەیەک دەبێت کە شایستەکانیان بەگوێرەی گرێبەستەکە گەرەنتی دەکرێت و مافەکانیان نافەوتێت.