کارەکانی یەکەمین کۆنفرانسی ئافرەتانی کوردستان کۆتاییهات

ئاڤا نیوز

کۆتایی بە کارەکانی دووەمین ڕۆژی کۆنفرانسی ئافرەتانی کوردستان هات کە لە هۆڵی سەعد عەبدوڵڵا لە هەولێر ساز کرا بوو.

چیرۆکی سەرەکی: کۆنفڕانسی ئافرەتانی کوردستان لە هەولێر بەڕێوەچوو، تێیدا 700 ئافرەت بەشدار بوون کە لەنێو ئۆرگانەکانی پارتی دیموکراتی کوردستان کار دەکەن، لە کۆنفرانسەکە دۆکیۆمێنتاریی (پارتی و ئافرەت، خەرمانێک لە باوەڕ و متمانە) پێشکەش کرا، لەلایەن تیپی کچانی دهۆک و شاریا نمایشی پانۆڕامای ئافرەتانی کوردستان کرا و پانێڵی تایبەتیش بە ڕەوشی ئافرەتان لە کوردستان بەڕێوەچوون.

لێدوانی فەرمی: ئامینە زکری، ئه‌ندامی مه‌كته‌بی سیاسیی پارتی دیموكراتی كوردستان و سەرپەرشتیاری کۆنفرانسەکە ڕایگەیاند: دوو ڕۆژی پڕ لە گفتوگۆ و تەوەری گرنگمان بە ڕێکرد، کۆنفرانسەکە بە سەرکەوتوویی کۆتایی هات و لیژنەی ڕاسپاردەکان، ئەنجامەکانی کۆنفرانسەکە کۆ دەکاتەوە و دواتر ڕاسپاردەکان دیراسە دەکرێن، بۆ لایەنی پەیوەندیدار دەنێردرێن.

ئەوەی پێویستە بیزانیت: سەرۆک مەسعوود بارزانی ئامادەی کۆنفرانسەکە بوو، وتارێکی پێشکەشکرد و چەند پەیامێکی ئاڕاستەی ئافرەتانی کوردستان کرد و ڕایگەیاند: بە هیواین کۆنفڕانسەکە ئەنجامی باشی هەبێت، ڕۆڵی ئافرەتی کورد لە ڕۆڵی پیاوان کەمتر نەبووە، بۆیە ئێوە بە تواناکانتان داهاتوو بوونیاد بنێن و ئێمەش پشتیوانتان دەبین.