کۆمسیۆنی هەڵبژاردنەکان هەڵوێستی خۆی لەبارەی به‌ پارێزگابوونی هه‌ڵه‌بجە ئاشکرا دەکات

ئاڤا نیوز

دوای به‌ پارێزگابوونی هه‌ڵه‌بجە، کۆمسیۆنی باڵای سەربەخۆی هەڵبژاردنەکانی عێراق هەڵوێستی خۆی لەبارەی ناساندنی ئەو پارێزگا نوێیە وەک بازنەیەکی سەربەخۆی هەڵبژاردن ئاشکرا کرد.

وێنە گەورەکە: دوای 12 ساڵ لە دواخستنیی بە هۆکاری جۆراوجۆر، ئەمڕۆ دووشەممە 14-04-2025، پەرلەمانی عێراق بە زۆرینەی دەنگی ئەندامان، پرۆژەیاسای بە پارێزگابوونی هەڵەبجەی پەسەند کرد.

لێدوانی فەرمی: جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکانی عێراق ڕایگەیاند: پەسەندکردنی هەڵەبجە وەک بازنەیەکی سەربەخۆ لە هەڵبژاردنی پەرلەمانی عێراق پێویستی بە هەموارکردنەوەی یاسای هەڵبژاردن و دیاریکردنی ژمارەی کورسییەکانی ئەو پارێزگا نوێیە هەیە.

- دەبێت دەقی یاسای بەپارێزگابوونی هەڵەبجە لەلایەن سەرۆکی کۆمارەوە پەسەند بکرێت و دواتر لە ڕۆژنامەی فەرمیدا بڵاوبکرێتەوە، دواتر بە فەرمانی سەرۆکایەتیی سنووری ئیداری ئەو پارێزگایە دیاری بکرێت.

- ئەم ڕێکارانە دامەزراندنی دەزگای سەربەخۆی تایبەت بە پارێزگای هەڵەبجەی لێدەکەوێتەوە، لەنێویاندا فەرمانگەی هەڵبژاردن و هەموارکردنەوەی یاسای هەڵبژاردن بۆ دیاریکردنی ژمارەی کورسییەکانی ئەم پارێزگایە لەسەر بنەمای دانیشتووانەکەی.

ئەمەش بزانە: ئەنجوومەنی وەزیرانی عێراق ڕۆژی 11-11-2025ـی دیارکردووە بۆ ئەنجامدانی هەڵبژاردنی خولی شەشەمی پەرلەمانی عێراق، کۆمیسیۆنی باڵای هەڵبژاردنەکانیش ئامادەیی خۆی بۆ بەڕێوەبردنی دەربڕیوە، پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.