ئاڤا ناوی قایمقامی خورماڵ ئاشکرا دەکات

ئاڤا نیوز

دوای نزیکەی ساڵێک لە دەرچوونی بڕیاری بەقەزابوونی خورماڵ هێشتا ڕێککارە کارگێڕییەکانی بە قەزابوونی تەواو نەکردووە و قایمقامی قەزاکەش دەستبەکار نەبووە، پارێزگاری هەڵەبجەش دەڵێت، "تاوەکو کۆتایی ئەم مانگە قایمقامی خورماڵ یەکلایی دەبێتەوە". ئاڤا میدیا ناوی بەهێزترین کاندیدی قایمقامی قەزاکە بڵاودەکاتەوە.

 

لێدوانی فەرمی: نوخشە ناسیح، پارێزگاری هەڵەبجە بە ئاڤا میدیای ڕاگەیاند، "بەبڕیاری ئەنجوومەنی وەزیران، خورماڵ بووەتە قەزا، ئێستا تەنیا ئەوە ماوە فەرمانێک دەربکرێت و کەسێک بە قایمقامی قەزاکە دەستنیشان بکرێت، ئەوەش لە بەرنامەدایە و هەوڵ دەدەین تاوەکو کۆتایی ئەم مانگە کێشەکە چارەسەر بکەین و قایمقام یەکلابکەینەوە و فەرمانی دەستبەکاربوونی بۆ دەربچێت".

 

زانیاریی ئاڤا: بەپێی زانیارییەکانی ئاڤا میدیا، چەند کەسێک داوای وەرگرتنی پۆستی قایمقامی خورماڵیان کردووە بەڵام بەهێزترین کاندیدیان فەرەیدون مەحموود، بەڕێوەبەری ئێستای ناحیەی خورماڵە.

 

لێدوانی فەرمی: فەرەیدوون مەحموود، بەرێوەبەری ناحیەی خورماڵ لەبارەی وەرگرتنی پۆستەکەوە بە ئاڤا میدیای ڕاگەیاند، "چەند جارێک بۆ بابەتی یەکلاکردنەوەی قایمقامی خورماڵ سەردانی هەولێر و وەزارەتی ناوخۆم کردووە، ئێستا دەسەڵاتی دانانی قایمقام دراوەتە دەستی نوخشە ناسیح، پاریزگاری هەڵەبجە، ئەویش داوای سیڤی و زانیارییەکانی منی کردووە و بۆم ناردووە و چاوەڕێی یەکلاکردنەوەی پرسەکەین".

 

باکگراوند: دوای ئەوەی سەرۆکوەزیران، مەسرور بارزانی لە ڕێکەوتی 30ی تەممووزی 2023، بڕیاری بەقەزاکردنی ناحیەی خورماڵی لە پارێزگای هەڵەبجە دەرکرد، ڕۆژی 9ی ئایاری 2024 نێچیرڤان بارزانی، سه‌رۆکی هه‌رێمی کوردستان، پاڵپشت به‌ یاسای سه‌رۆکایه‌تیی هه‌رێمی کوردستان، ژماره‌ یەکی ساڵی 2005ی هه‌موارکراو و له‌به‌ر ڕۆشناییی داواکاریی ئه‌نجوومه‌نی وه‌زیرانی هه‌رێمی کوردستان، بڕیاری دا به‌ هێنانه‌کایه‌ی قه‌زای خورماڵ له‌ سنووری پارێزگای هه‌ڵه‌بجه‌ به‌ هه‌مان سنووری ناحیه‌ی خورماڵ.