مەشهەدانی داوا لە سوودانی دەکات قەزای زوبێر بکات بە پارێزگا

ئاڤا نیوز

بەنوسراوێکی فەرمی، مەحموود مەشهەدانی، سەرۆکی پەرلەمانی عێراق داوای بەپارێزگابوونی قەزای زوبێر لە سەرۆکوەزیرانی عێراق دەکات و داواکەشی بە واژۆی 100 پەرلەمانتار پشتگیری دەکرێت.

وێنە گەورەکە: بەرامبەر بەپارێزگابوونی هەڵەبجە کە ڕۆژی 14-4-2025 لە پەرلەمانی عێراق دەنگی لەسەر درا،  داوای بە پارێزگاکردنی هەریەکە لە  تەلعەفەر، شنگال و دەشتی نەینەوا دەکرێت،  هاوکات 100 پەرلەمانتار ئیمزایان کۆکردووەتەوە بۆ ئەوەی دەنگ لەسەر بەپارێزگابوونی قەزای زوبێر لە پارێزگای بەسرە بدرێت.

لێدوانی فەرمی: ڕەفیق ساڵحی، پەرلەمانتار لەفراکسیۆنی سادیقون، باڵی سیاسی بزووتنەوەی عەسائیبی ئەهلی حەق کە قەیس خەزعەلی سەرۆکایەتی دەکات، ڕایگەیاند: سەرۆکایەتیی پەرلەمانی عێراق ڕەزامەندی لەسەر بەپارێزگابوونی قەزای زوبێر داوە.

- ساڵحی نوسراوێکی نووسینگەی سەرۆکی پەرلەمانی عێراق بڵاوکردووەتەوە کە ئاراستەی نووسینگەی محەممەد شیاع سوودانی، سەرۆکوەزیران کردووە، تێیدا داوای بە پارێزگابوونی قەزای زوبێر دەکات.

قوڵتر: ئەو پەرلەمانتارە لەگەڵ نوسراوەکە هاوپێچێکی بڵاوکردووەتەوە و واژۆی 100 پەرلەمانتاری لەسەرە کە داوای بەپارێزگابوونی زوبێر دەکەن، هاوکات لەکۆمێنتێکدا نووسیویەتی، مژدە بێت بۆ خەڵکی زوبێر بەم زوانە خەونی بەپارێزگابوونی شارەکەتان دێتەدی.

ئەمەش بزانە: قەزای زوبێر دەکەوێتە ڕۆژئاوای پارێزگای بەسرەوە، لە ڕێککەوتی 2-1-1964 بەفەرمی لەناحیەوە کراوە بە قەزا، ڕووبەرەکەی 11 هەزار و 628 کیلۆمەتر چوارگۆشەیە و ژمارەی دانیشتوانەکەشی بەناحیەکانی دەوروبەرییەوە بە زیاتر لە ملێۆنێک کەس مەزەندە دەکرێت.