لە شەقڵاوە پاشماوەی خۆراک لە زبڵ و خاشاک جیا دەکرێتەوە

ئاڤا نیوز

بۆ یەکەم جار لە هەرێمی کوردستان لە قەزای شەقلاوە پاشماوەی خۆراک لە زبڵ و خاشاک جیا دەکرێتەوە، سەرەتا پڕۆژەکە وەک تاقیکردنەوە لە گەڕەکی شەهیدانی شارەکە جێبەجێدەکرێت.

چیرۆکی سەرەکی: لە قەزای شەقڵاوە دەستکراوە بە جیا کردنەوەی پاشماوەی خۆراک لە زبڵ و خاشاک، وەک سەرەتا پڕۆژەکە لە گەڕەکێکی شارەکە جێبەجێدەکرێت و ستاف و ئۆتۆمبێل و حاویەی تایبەتی بۆ دانراوە، ئەو پاشماوەی خۆراکەشی کۆدەکرێتەوە دەدرێت بە ئاژەڵانی بێلانە.

زانیاریی زیاتر: هەموو ڕۆژێک دوای کاتژمێر چوار ئۆتۆمبێلی تایبەت کە تەنیا پاشماوەی خۆراک کۆ دەکاتەوە، کۆڵان بە کۆڵانی گەڕەکەکە دەگەڕێت و لەلایەن شارەوانی شەقڵاوەوە سەرپەرشتی دەکرێت.

لێدوانی فەرمی: ڕێکار حوسێن، سەرۆکی شارەوانی شەقڵاوە، بە ئاڤای وت:  10 رۆژە پڕۆژەکە کەوتووەتە بواری جێبەجێکردن، دانیشتوانی گەڕەکەکە بە گەرمی پێشوازیان لێکردووە و پێیەوە پابەندن.

ئەمەش بزانە: لە سەنتەری قەزای شەقڵاوە ڕۆژانە زیاتر لە 60 تۆن زبڵ و خاشاک کۆدەکرێتەوە، لە وەرزی بەهار و هاوین بەهۆی زۆری ئەو گەشتیارانەی ڕوو لە شەقڵاوە دەکەن بڕی زبڵ و خاشاک زیاتر لە 70 تۆن دەبێت.