چارەسەری كێشەكان لەگەڵ هەولێر دەكرێتە مەرجی سەردانی سوودانی بۆ ئەمریكا

ئاڤا نیوز

وابڕیارە لە مانگی نیسان سەرۆکوەزیرانی عێراق سەردانی واشنتن بکات و لەگەڵ گەورە بەرپرسانی ئەمریکا کۆببێتەوە، واشنتن چارەسەری کێشەکانی هەولێر و بەغدای وەک یەکێک لە مەرجەکانی سەردانەکەی سوودانی بۆ واشنتن داناوە.

بۆچی گرنگە: فشاری ئەمریكا بۆ سەرۆكوەزیرانی عێراق وادەكات كێشەكانی نێوان هەولێر و بەغدا، بەتایبەت لەبواری دارایی و ناردنی بەشە بوودجەی هەرێمی كوردستان زووتر چارەسەر بكرێن.

ئەوەی پێویستە بیزانیت: لە ڕاپۆرتێکدا پێگەی ئەلمۆنیتۆر باس لە سەردانەکەی سوودانی دەکات بۆ واشنتن و نوسیویەتی: دوو بەرپرسی ئەمریکا کە نەیانویستووە ناوی خۆیان ئاشکرابکەن بە سوودانیان گوتووە، مەرجێک لەو مەرجانەی کە پێشوازیەکی باش و گەرم لە سوودانی دەکرێت ئەوەیە دەبێت سوودانی کێشەکانی حکومەتەکەی لەگەڵ حکومەتی هەرێمی کوردستاندا چارەسەر بکات.

لەلایەکی دیکەوە: جەیک سۆلیڤان، راوێژکاری ئاسایشی نیشتیمانی ئەمریکا لە پەراوێزی کۆڕبەندی ئابووری جیهانیدا چاوی بەسوودانی کەوتووە و پێی گوتووە، دەبێت لە دۆخێکی باشدا سەردانی واشنتن بکەیت. ئەو سەردانەی سوودانی کە تا ئێستا کاتەکەی دیاری نەکراوە لەکاتێکدایە کە لە 26ی مانگی ڕابردوو بەسەردانێکی فەرمی سەرۆکوەزیران بارزانی گەیشتە واشنتن و لەگەڵ گەورەبەرپرسانی ئەمریکا کۆبووەوە.