17ـەمین پێشانگەی نێودەوڵەتیی هەولێر بۆ كتێب کۆتایی دێت

ئاڤا نیوز

 

لەماوەی 11 ڕۆژی حەڤدەهەمین پێشانگەی نێودەوڵەتی هەولێر بۆ کتێب، نزیكەی ملیۆنێک كەس سەردانی پێشانگەكەیان كردووە و سەرووی ملیۆنێک كتێب فرۆشراوە.

 

چیرۆكی سەرەكی: ڕۆژی 9ـی نیسانی 2025، سەرۆک بارزانی 17ـەمین پێشانگەی نێودەوڵەتیی هەولێر بۆ کتێبی کردەوە، كە ئەم ساڵ پێشانگاکە لەژێر ناونیشانی 'جیهان بە کوردی دەدوێت' بەڕێوەچوو، تێیدا 350 خانەی چاپ و بڵاوكردنەوە لە 22 وڵاتی عەرەبی و جیهانی بەشدارییان كرد کە بەشێک لە دەزگاكانی چاپ و بڵاوكردنەوە، یەكەمجاربوو بەشداریی بكەن و بۆ ئەم مەبەستەش لە وڵاتانی مەغریب، ئێران، توركیا، لوبنان و وڵاتانی كەنداو هاتبوون.

 

چی ڕوویدا: جگە لە نمایشكردنی هەزاران ناونیشانی پەرتووكی، بەدرێژایی ڕۆژانی پێشانگاكە، چەندین پانێڵ و دیبەیتی ڕۆشنبیری بە بەشداری نووسەران و رۆشنبیران و شارەزایانی كورد و بیانی بەڕێوەچوو لەبارەی بابەتە زانستی، ئەدەبی و فەرهەنگییەكان بەتایبەت بایەخی وەرگێڕان و زمانەوانی.

 

زانیاریی زیاتر: هاوكات بە بەشداریی ژمارەیەك نووسەری عێراقی و عەرەبی و جیهانی، گفتوگۆی كراوەی ڕۆشنبیری و كولتووری جۆراوجۆر سازكرا، لەوانەش: چالاكی خوێندنەوەی شیعر و مەراسیمی واژۆكردنی كتێبە نوێیەكان، سەرجەم ئەو چالاكییانەش بەهەماهەنگی لەگەڵ یەكێتی ئەدیبان و نووسەرانی عێراق و كۆمەڵەی بڵاوكراوە و كتێبخانەكانی عێراق و یەكێتی نووسەرانی كورد ڕێكخرابوو. 

 
ئەوەش بزانە: ناونانی پێشەنگاكەی ئەمساڵ بە ناونیشانی (جیهان بەكوردی دەدوێت) وەك پێزانینێكە بۆ زمانی كورد و ئەو هەوڵە فراوانەی لە وەرگێڕانی كتێبە جیهانییەكان بۆ سەر زمانی كوردی دەستیپێكردووە، هاوكات وەك پاڵپشتییەک بوو بۆ بەفەرمی ناساندنی زمانی کوردی لەلایەن گوگڵەوە.

 

باكگراوند: پێشانگەی نێودەوڵەتی کتێب لە هەولێر ساڵانە بەڕێوەدەچێت و دامەزراوەی مەدا بۆ ڕاگەیاندن و ڕۆشنبیری و هونەر، بە چاودێری سەرۆک مەسعود بارزانی و بەهاوکاری وەزارەتی رۆشنبیری و لاوانی حکومەتی هەرێمی کوردستان ڕێكیدەخات.