هەڤال ئەبووبەکر: لە سلێمانی هیچ کەسێک ناتوانێت ڕێگری لە هەژماری من بکات

ئاڤا نیوز

پڕۆژەی هەژماری من لە سلێمانی بە تەواوی جێبەجێ دەکرێت و پارێزگاری شارەکەش دەڵێت، ئێمە کار بە نووسراوەکانی ئەنجوومەنی وەزیران دەکەین و گوێ بە هیچ لایەنێکی سیاسی نادەین کە ببێتە ڕێگر لە بەردەم پڕۆژەکە.

وێنە گەورەکە: تا ئێستا 750 هەزار مووچەخۆر لە پرۆژەی 'هەژماری من' تۆمارکراون، 450 هەزار کارتی پرۆژەکە دابەشکراوە و 300 هەزار کارتیش ماوە دابەش بکرێت. لەو 750 هەزار مووچەخۆرەی خۆیان تۆمار کردووە، تەنیا 100 هەزار کەسیان لە سنووری پارێزگاکانی سلێمانی و هەڵەبجەن.

لێدوانی فەرمی: هەڤاڵ ئەبووبەکر، پارێزگاری سلێمانی لە کۆنگرەیەکی رۆژنامەواندا سەبارەت بە پڕۆژەی هەژماری من ڕایگەیاند: لەسنووری پارێزگای سلێمانی هیچ کەس و لایەنێک ناتوانێت ڕێگربێت لە پڕۆژەکە یان بەزۆر فۆڕم بە فەرمانبەران پڕبکاتەوە و خۆوستانە فەرمانبەران بەشداری لە 'هەژماری من' دا دەکەن و ئەوانەی دەکرێن هەموویان ڕێکاری کارگێڕی ، یاسایی و دارایین و ئێمە کار لەسەر ئەوە نووسراوانە دەکەین کە لە  ئەنجوومەنی وەزیرانی حکومەتی هەرێمی کوردستان بۆمان دێت گوێ لە هیچ حکومەتێک و هیچ لایەنێکی سیاسی ناگرین.