لەدوای نەمانی ئەسەد یەکەم باری گەنم دەگەینرێتە سووریا

 

ئاڤا نیوز

یەکەم باری گەنم لە ڕێگەی کەشتییەوە لە دوای نەمانی ڕژێمی بەشار ئەسەد گەیشتە سووریا، حکومەتی ئەو وڵاتەش دەڵێت، ئەمە هەنگاوێکی گرنگە بۆ بووژانەوەی ئابووری سووریا.

وێنە گەورەکە: لەدوای کەوتنی ڕژێمی بەشار ئەسەد، ئێران و ڕووسیا وەک دابینکەرێکی سەرەکی گەنم و پێداویستییەکانی دیکە بۆ ئەو وڵاتە، هەناردەکردنی ئەو بەرهەمانەیان بۆ سووریا ڕاگرتبوو.

ڕاگەیێنراوی فەرمی: دەستەی گشتیی سنوورە وشکانی و دەریاییەکانی سووریا لە ڕاگەیێنراوێکدا ڕایگەیاندووە، کەشتییەک لە بەندەری لازقییەوە لەڕێگەی سەرمایەدارێکی ڕووسییەوە، شەش هەزار و 600 تۆن گەنمی هەڵگرتووە و گەیاندوویەتی سووریا.

ئەم هەنگاوە ئاماژەیەکی ڕوونە بۆ دەستپێکردنی قۆناغێکی نوێی بووژانەوەی ئابووری سووریا و پێویستە ڕێگە خۆش بکرێت بۆ هێنانی زیاتری پێداویستییە گرنگەکان.

لە لایەکی دیکەوە: نەتەوەیەکگرتووەکان ڕایگەیاندووە، بەهۆی بەرزبوونەوەی نرخی نان و کاڵا سەرەتاییەکان، لە 90% سوورییەکان لە ژێر هێڵی هەژارییدان.