ئەردۆغان: ڕێککەوتنی هەسەدە و دیمەشق بەربەست لە بەردەم پرۆسەی ئاشتی ناهێڵێت

ئاڤا نیوز

سەرۆککۆماری تورکیا ئاماژە بەوە دەدات کە سەقامگیری و ئارامی باکووری سووریا و ڕۆژئاوای کوردستان ڕاستەوخۆ کاریگەریی دەکاتە سەر وڵاتەکەی و دەڵێت: گەورەترین ئاواتمان ئەوەیە سووریا لەسەر بنەمای یەک دەوڵەت و یەک سوپا یەک بخرێتەوە.

چیرۆکی سەرەکی: لە کاتی گەڕانەوەی لە گەشتەکەی لە میسرەوە بۆ تورکیا، ڕەجەب تەیب ئەردۆغان بۆ میدیاکان قسەی کرد وتی: "لە ئەگەری پابەندبوونی هەسەدە بە ڕێککەوتنەکان لەگەڵ حکومەتی سووریا، ئارامی باڵ بەسەر سووریادا دەکێشێت و سەقامگیر دەبێت."

لێدوانی فەرمی: سەرۆککۆماری تورکیا قسەی بۆ میدیاکانی وڵاتەکەی کرد و بەبێ ناوهێنان هۆشداری بە هەسەدە دەدات و دەڵێت: "با کەس بە خەیاڵیش بیر لەوە نەکاتەوە یاری بە کات بکات و ببێتە هۆی تەشەنەسەندنی گرژی و پێکدادانەکان، با کەس لێکدانەوەی هەڵە بۆ دۆخەکە نەکات، چونکە تورکیا و سووریا باش ئەوە دەزانن."

ئەردۆغان، دەشڵێت: "هاووڵاتییانی سووریا بە کورد، عەرەب، تورکمان و عەلەوی بە برای خۆمان دەزانین و کێشەی ئێمە لەگەڵ ئەوانەدایە کە وەک داردەست بەکاردەهێنرێن بۆ مەیلی جوداخوازی."

٠ بە چارەسەرکردنی ئەو کێشەیەی لە باکووری سووریا سەری هەڵدابوو، بارگرانییش لەسەر پرۆسەی ئاشتی نەماوە.

٠ زۆری نەماوە کۆمیسیۆنە پەرلەمانییەکە ڕاپۆرتی هاوبەش ئامادە بکات.

ئەوەی پێویستە بیزانیت: ڕۆژی 30ـی کانوونی دووەم، ڕێککەوتنی نێوان هەسەدە و حکومەتی سووریا بڵاوکرایەوە کە لە 14 خاڵ پێکهاتبوو بووە بنەمای ڕاگەیاندنی ئاگربەستی هەمیشەیی.