چوار ئەندامی داعش لە کفری دەستگیرکران

ئاڤا نیوز

 

شەوی ڕابردوو لە ئۆپەراسیۆنێکدا لە قەزای کفری، چوار کەس بەتۆمەتی ئەندامێتی داعش دەستگیرکران و سەرچاوەیەکیش لە هێزە ئەمنییەکان ڕایدەگەیێنێت، دەستگیرکراوەکان ئەندامی شانە نووستووەکانی داعش بوون.

 

وێنە گەورەکە: ماوەیەکە جموجوڵی شانە نووستووەکانی داعش لەسنووری ئیدارەی گەرمیان و ناوچەکانی دەرەوەی ئیدارەی هەرێمی کوردستان، بەتایبەت لە ناوچەکانی بۆشایی ئەمنی زیادی کردووە، ئۆپەراسیۆنەکانی هێزە ئەمنییەکانیش بۆ دوورخستنەوەی مەترسییەکان و دەستگیرکردنی ئەندامەکانیان زیاتر بووە.

 

زانیاری تایبەت: سەرچاوەیەکی ئەمنی لە ئیدارەی گەرمیان بە ئاڤا میدیای ڕاگەیاند: "کاتژمێر 10:00 تاوەکو 11:35 خولەکی شەوی یەکشەممە، هێزێکی دژەتیرۆری یەکێتی لە ئۆپەراسیۆنێكدا لەنێو گەڕەکی هەوار لە کفری، چوار چەکداری بە تۆمەتی ئەندامێتی داعش دەستگیر کرد".

زانیاریی زیاتر: سەرچاوە ئەمنییەکە گووتیشی: "شانە نووستووەکانی داعش لە هەموو شوێنێک هەن، ئەو گرووپەش کە دەستگیرکراون شانەی نووستووبوون".

لێدوانی فەرمی: ساهیر عەلی، قایمقامی کفری بە ئاڤا میدیای ڕاگەیاند: "ئەو کەسانەی دەستگیرکراون نازانین داعشن یان گومانلێکراون، ئەمە بابەتێکی ئەمنییە، بەڵام کەسێک بەناوی ڕۆکان کە دانیشتووی کفرییە لەلایەن هێزە ئەمنییەکەوە بە ڕێکاری یاسایی دەستگیرکراوە".