نزیکەی 300 ماتۆڕسکیلی دەستبەسەرداگیراو لە هەڵەبجە لەناودەبرێن

ئاڤا نیوز

 

ئەو ماتۆڕسکیلانەی لە ماوەی ڕابردوو لەلایەن مەفرەزەکانی پۆلیس و ئاسایشی شارەزوور لە سنووری پارێزگای هەڵەبجە دەستیان بەسەرداگیراوە، بە ڕەزامەندی وەزارەتی ناوخۆ پاندەکرێنەوە و بە ئاسن دەفرۆشرێن.

 

وێنە گەورەکە: دوای زیادبوونی ڕووداوەکانی هاتووچۆ لە سنووری پارێزگای هەڵەبجە و سکاڵای هاووڵاتیان، پۆلیس و ئاسایش لە سنووری پارێزگای هەڵەبجە ڕێکاری تووندیان بەرامبەر ئەو کەسانە گرتەبەر کە ماتۆڕسکیلی بێ مۆڵەت لێدەخوڕن و هاووڵاتییان بێزار دەکەن، لەماوەی ڕابردوو مەفرەزەکان دەستیان بەسەر 285 ماتۆڕسکیلدا گرتووە، بەهۆی ئەوەی تابلۆیان نییە و نایاسایین خاوەنەکانیان ناتوانن وەریبگرنەوە، بۆیە لەناو دەبرێن و بە زیادکردنی ئاشکرا بە ئاسن دەفرۆشرێن.

 

لێدوانی فەرمی: عەقید عەتا بەهرام، بەڕێوەبەری هاتووچۆی پارێزگای هەڵەبجە، بە ئاڤا میدیای ڕاگەیاند، "دەستبەسەرداگرتنی ئەم ماتۆڕسکیلانە لەلایەن مەفرەزەکانی ئاسایش و پۆلیس دوای زیادبوونی ڕووداوەکانی هاتووچۆ لە سنووری پارێزگای هەڵەبجە دێت، لەسەر فەرمانی وەزارەتی ناوخۆ ماتۆڕەکان پاندەکەینەوە و بەشێوەی ئاسن دەیانفرۆشین".

 

زانیاریی زیاتر: بەڕێوەبەری هاتووچۆی پارێزگای هەڵەبجە، گووتیشی، "هەموو هاووڵاتیان و بەڵێندەران ئاگاداردەکەینەوە لە زیادکردنێکی ئاشکرادا هەڵدەستین بە پانکردنەوە و وورد کردنی کۆمەڵێک" ماتۆڕسکیلی" دەست بەسەرداگیراو پاشان فرۆشتنیان بە شێوەی ئاسن، هەرکەس ئارەزووی بەشداریکردنی هەیە دەتوانێت سەردانی بەڕێوەبەرایەتیی هاتووچۆی پارێزگای هەڵەبجە بکات بۆ پێشکەش کردنی داواکاری، زیادکردنەکە لە ڕۆژی یەکشەممە ڕێکەوتی 27-4- 2025   کاتژمێر 10ـی پێش نیوەڕۆ لە بینای بەڕێوەبەرایەتیی هاتووچۆی هەڵەبجە ئەنجام دەدرێت".

 

ئەوەی پێویستە بیزانیت: جگە لەو ژمارە ماتۆڕسکیلە کە بڕیارە لەناو ببرێن، نزیکەی 200 ماتۆڕسکیلی دیکەش دەستی بەسەرداگیراوە، هاتووچۆی هەڵەبجە چاوەڕێی فەرمانی وەزارەتی ناوخۆیە بۆ لەناوبردنی ئەوانیش.