کێشەی کەمئاوی ناحیەی قەسرێ چارەسەر دەکرێت

ئاڤا نیوز

 

کەمی ئاوی خواردنەوە لە ناحیەی قەسرێ گرفتێکی سەرەکی دانیشتووانەکەیەتی، بۆ چارەسەری کێشەکەش پڕۆژەیەکی گەورەی دابینکردنی ئاو جێبەجی دەکرێت.

وێنە گەورەكە: پرۆژه‌یه‌كی گه‌وره‌ی دابینکردنی ئاوی خواردنه‌وه‌ لە ناحیەی قەسرێ جێبەجێ دەکرێت، كه‌ بریتییه‌ له‌ لێدانی دوو بیری ئاو و دروستكردنی خه‌زانێک له‌ته‌نیشت ڕووبار بۆ گه‌یاندنی ئاوی خواردنه‌وه‌ به‌ شاره‌دێى قه‌سرێ، گوژمه‌ی پرۆژه‌كەش له‌سه‌ر بودجه‌ی پلانی وه‌زاره‌تی شاره‌وانی و گه‌شتوگوزار دابین ده‌كرێت.

لێدوانی فەرمی: ئه‌ندازیار ئاری ئه‌حمه‌د، به‌ڕێوه‌به‌ری گشتیی ئاو و ئاوه‌ڕۆ له‌ وه‌زاره‌تی شاره‌وانی و گه‌شتوگوزار بە ئاڤای ڕاگه‌یاند، "گوژمەی زیاتر لە ملیارێك و 687 ملیۆن دینار له‌سه‌ر بودجه‌ی پلانی وه‌زاره‌تی شاره‌وانی بۆ جێبەجێكردنی پرۆژه‌ی ئاوی خواردنه‌وه‌ی قه‌سرێ تەرخانكراوە، كه‌ پێكهاتووه‌ له‌ لێدانی دوو بیری ئاو له‌ ته‌نیشت ڕووبار به‌ مه‌به‌ستی گه‌یاندنی ئاوی خواردنه‌وه‌ بۆ ناحیەكە".

- به‌ڕێوه‌به‌ری گشتیی ئاو و ئاوه‌ڕۆ ئاماژەی بەوەشكرد، "ماوه‌ی ته‌واوبوونی پرۆژه‌كه‌ 180 ڕۆژی بۆ دیاری كراوه‌ و پێكهاته‌كانیشی بریتییه‌ له‌ لێدانی بیر و دروستکردنی سێ خەزانی گه‌وره‌ی ئاو و دانانی بۆریی (دکتایل) بە درێژایيی زیاتر له‌ پێنج كیلۆمه‌تر، له‌گه‌ڵ چه‌ندین تایبه‌تمه‌ندیی دیكه‌ش".

بۆچی گرنگە: تەواوبوونی پڕۆژەكە ده‌بێته‌ هۆی چاره‌سه‌ركردنی گرفتی كه‌مئاوی له‌ شارەدێی قەسرێ و ئاستی به‌رهه‌مهێنانی ئاو و پرۆسه‌ی دابه‌شكردنی ئاو لەو دەڤەرە باشتر ده‌كات.

باکگراوند: ناحیەی قەسرێ دەکەوێتە ئیدارەی سەربەخۆی سۆران و سەر بە قەزای چۆمانە، ژمارەی دانیشتووانی ناحیەکە بە گوندەکانییەوە نزیکەی 9 هەزار کەسە و زیاتر لە 5 هەزار و 700 کەسیان لەنێو سەنتەری ناحیەکەدا نیشتەجێن.