سەعدی پیرە: نوێکردنەوەی ڕێککەوتنی ستراتیژی پارتی و یەکێتی پێویستییە

ئاڤا نیوز

وتەبێژی یەکێتی نیشتمانی کوردستان باس لە کۆبوونەوەکانی هەردوو شاندی دانووستانکاری پارتی و یەکێتی دەکات، دەڵێت 'نوێکردنەوەی ڕێککەوتننامەی ستراتیژی نێوانمان گرنگە و پێویستییە، بەشێوەیەک لەگەڵ بارودۆخی ناوخۆیی و هەرێمی و ناوچەکەدا بگونجێنرێت.

چیرۆکی سەرەکی: سەعدی ئەحمەد پیرە، وتەبێژی یەکێتی نیشتمانی کوردستان میوانی هەواڵەکانی کاتژمێر 12ـی ئاڤا بوو، چەندین بابەتی گرنگی سەبارەت بە کۆبوونەوەی هەردوو شاندی دانووستانکار و دابەشکردنی پۆستەکان و ڕێککەوتنی نێوان پارتی و یەکێتی خستەڕوو.

لێدوانی فەرمی: سەعدی ئەحمەد پیرە، وتەبێژی یەکێتی نیشتمانی کوردستان بۆ ئاڤا ڕایگەیاند: کۆبوونەوەی داهاتووی هەردوو شاندی دانووستانکار لەسەر شێوازی دابەشکردنی پۆستەکان دەبێت.

"تاوەکو ئێستا پۆستەکان دابەش نەکراوە، تەنیا سەرنج و تێبینییەکان لەوبارەیەوە خراوە ڕوو".

"ئەوەی تاوەکو ئێستا هەردوولا لەسەری ڕێککەوتوون، دیدی هاوبەشە بۆ پێکەوە کارکردن و شەراکەت لە داهاتوودا".

"بابەتی بەبانکیکردنی مووچە و ژیانی خەڵک باسکراوە، ئەمەش بەگوێرەی ڕێنماییەکانی بانکی ناوەندی و لە ژێر چاودێری ئەودا کراوە، هەروەها خەڵک هەژمارەکەی پارێزراو دەبێت، ئەمەش شتێکە یەکێتی و پارتی ڕازیکردووە و شتێکی باشە".