لە ئێران زیندانیکراوێکی کورد بێ ئاگادارکردنەوەی خانەوادەکەی لەسێدارە دەدرێت

ئاڤا نیوز

 

زیندانیکراوێکی کوردی ڕۆژهەڵاتی کوردستان بەناوی حەمید حوسێن حەیدەرانلو، لە یەكێک لە گرتووخانەکانی ئێران بێ ئاگادارکردنەوەی خانەوادەکەی لەسێدارە دەدرێت. 

 

وێنە گەورەکە: دەسەڵاتدارانی ئێران بەردەوامن لە لەسێدارەدانی هاووڵاتیانی ئەو وڵاتە بە بیانووی جیاواز بەشێک لەوانەش بەهۆکاری سیاسییە و ئامانج لێی سەرکوتکردنی دەنگی جیاوازە، ئەمەش لە کاتێکدایە وڵاتانی جیهان و ڕێکخراوەکانی مافی مرۆڤ بەردەوام هۆشداری دەدەن بەو وڵاتە لە بەردەوامبوون لەسەر پێشلکارییەکانی دژ بە مافی مرۆڤ.

 

زانیاریی زیاتر: حەمید حوسێن نەژاد حەیدەرانلو، زیندانی سیاسی کورد کە چەن ڕۆژێک بوو سزای لەسێداردانی بۆ دەرکرابوو بەڵام بەهۆی گردبوونەوەی تەواوی ئەندامانی خێزانەکەی و چالاکانی مەدەنی لەبەردەم گرتووخانەکە، سزاکە بۆماوەی چەند ڕۆژێک دواخرا.

 

ئەمەش بزانە: ڕۆژی دووشەممە بەشێوەیەکی نهێنی و لە شوێنێکی شاراوەدا، سزای لە سێدارەدا بەسەر ئەو زیندانیکراوەدا جێبەجێ کرا. 

ڕاگەیێنراویی فەرمی: ئاژانسی هەواڵی فارس سەر بە سوپای پاسدارانی ئێران بڵاویکردەوە، سزای لەسێدارەدان حەمید حوسێن نەژاد حەیدەرانلو جێبەجێ کراوە. 

لەلایەکی دیکەوە: جێگری داواکاری گشتی ورمێ، بنەماڵەی لەسێدارەدراوی ئاگادارکردووەتەوە کە نابێت داوای تەرمەکەی بکەنەوە و نابێت هیچ مەراسیمێکی پرسەش بەڕێوە ببەن.