مەسرور بارزانی و باڵیۆزی نوێی بەریتانیا پرسی هەناردەکردنەوەی نەوتی کوردستان تاوتوێ دەکەن

ئاڤا نیوز

 

سەرۆکوەزیران مەسرور  بارزانی، پێشوازی لە باڵیۆزی نوێی شانشینی یەکگرتوو لە عێراق کرد، هەر لەمیانەی کۆبوونەوەکەیاندا تاوتوێی هەڵبژاردنی داهاتووی ئەنجوومەنی نوێنەرانی عێراق و دەستپێکردنەوەی هەناردەکردنەوەی نەوتی کوردستانیان کردووە. 

 

ڕاگەیێنراوی فەرمی: فەرمانگەی میدیا و زانیاریی حکومەتی هەرێمی کوردستان بڵاویکردەوە، ئەمڕۆ سێشەممە، مەسرور بارزانی سەرۆکوەزیرانی هەرێمی کوردستان پێشوازی لە عیرفان سدیق، باڵیۆزی نوێی شانشینی یەکگرتوو لە عێراق کرد. 

- سەرۆکوەزیران وێڕای پیرۆزبایی هیوای سەرکەوتنی بۆ باڵیۆز خواست، هاوکات ئامادەی پشتیوانی حکومەتی هەرێمی کوردستانی دەربڕی لەپێناو پێشخستنی زیاتری پەیوەندییەکانی نێوانیان لەگەڵ شانشینی یەکگرتوو. 

لەلایەکی دیکەوە: باڵیۆزی شانشینی یەکگرتوو لە کۆبوونەوەکەدا ئاماژەی بەوەداوە کە لە ساڵانی ڕابردوو کوردستان پێشکەوتنی باشی بەخۆیەوە بینیوە و ئامادەیی وڵاتەکەشی بۆ پەرەپێدانی پەیوەندی هاوبەش دووپات کردەوە. 

ئەمەش بزانە: لە بەشێکی دیکەی دیدارەکەدا کە ئەندرۆ بیزلی، کونسوڵی گشتیی شانشینی یەکگرتوو لە هەرێمی کوردستان ئامادەی بوو، هەردوولا جەختیان لە پێویستی چارەسەرکردنی کێشەکانی هەرێمی کوردستان و حکومەتی فیدراڵ و ڕێزگرتن لە سیستەمی فیدراڵی عێراق و قەوارەی دەستووریی هەرێمی کوردستان و دەستپێکردنەوەی هەناردەکردنی نەوتی هەرێم لە زووترین کاتدا کردەوە .

- هەروەها ئامادەکارییەکانی ئەنجامدانی هەڵبژاردنی داهاتووی ئەنجوومەنی نوێنەرانی عێراق لە مانگی نۆڤێمبەری ئەمساڵ تاوتوێ کرا.