وادەی "کۆنفرانسی نیشتیمانیی کورد" لە ڕۆژئاوای کوردستان دیاریکرا

ئاڤا نیوز

پارتی یەکێتی دیموکرات (پەیەدە) و ئەنجوومەنی نیشتیمانی کورد (ئەنەکەسە) ڕێککەوتن و ڕۆژی 26ی ئەم مانگەیان بۆ بەڕێوەچوونی کۆنفرانسی نیشتیمانیی کورد لە ڕۆژئاوای کوردستان دیاریکرد.

چیرۆکی سەرەکی: بڕیارە هێزە سیاسییەکانی ڕۆژئاوای کوردستان کۆنفرانسی نیشتیمانیی ببەستن کە تێیدا داواکارییەکانی کورد لە دەسەڵاتی نوێی دیمەشق و دەستووری داهاتووی وڵاتەکەدا دیاری بکرێن، هاوکات بڕیاریشە دوای کۆنگرە لیژنەیەکی یەکگرتوو بۆ دانوستان بچێتە دیمەشق.

ڕاگەیێنراوی فەرمی: فەیسەڵ یوسف، وتەبێژی ئەنجوومەنی نیشتیمانیی کوردی (ئەنەکەسە) بە ئاڤا میدیای ڕاگەیاند: ڕێککەوتن کراوە لەسەر دیاریکردنی ڕۆژی شەممە 26ی ئەم مانگە وەکو وادەی کۆنفرانسی نیشتمانیی کورد بۆ یەکڕیزی و یەکهەڵوێستیی کورد.

- ئەم دەستکەوتە دەربڕینە لە ئیرادەی گەلی کوردمان و هەوڵی ماندوونەناسانەی تێکۆشەرە دڵسۆزەکانمان. هاوکات بە پاڵپشتی بەخشندانەی برایان و دۆستانمان، بەتایبەتی جەنابی سەرۆک مەسعود بارزانی و جەنەراڵ مەزڵووم عەبدی بوو.

لەلایەکی دیکەوە: مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) لە تۆڕی "ئێکس" ڕایگەیاند: بە دڵخۆشییەوە بە گەلی خۆمان ڕادەگەیێنین کە کۆنفرانسی "یەکڕیزیی و یەکهەڵوێستی کورد لە ڕۆژئاوا لە 26ی نیسان ڕێکدەخرێت.

- یەکێتیی کورد پێویستییەکی کوردییە بۆ چارەسەرکردنی دۆسیەی کورد لە سووریا و هیوادارین هەموو لایەنەکان بە بەرپرسیارەتیی نەتەوەیی خۆیان هەستن.

ئەوەی پێویستە بیزانیت: بڕیاربوو ڕۆژی 18ی ئەم مانگە کۆنفرانسەکە بکردێت، بەڵام ئەنەکەسە تێبینیی لەسەر ناو و چۆنییەتی ئامادەکارییەکانی تایبەت بە کۆنگرەکە هەبوو، بۆیە بۆ کاتێکی نادیار دواخرا.