ئەمریکا بۆ ئاڤا: حکومەتێکی بەهێز و خۆڕاگر بەخێرایی پێکبهێنرێت

ئاڤا نیوز

ئەمریکا جەخت لەوە دەکاتەوە، حکومەتێکی بەهێز و خۆڕاگری هەرێمی کوردستان پێویستە بۆ ئاسایش و سەقامگیری عێراق، کونسوڵخانەی ئەمریکا داوا دەکات بە خێرایی کابینەی نوێی حکومەتی هەرێمی کوردستان پێکبهێنرێت.

وێنە گەورەکە: بەرپرسانی ئەمریکا چەندین جار باسیان لەوەکردووە، هەرێمی کوردستان هاوبەشێکی گرنگی ئەمریکایە لە ناوچەکەدا و پێویستە پەیوەندییە بازرگانییەکان پەرەپێبدەن.

لێدوانی فەرمی: وتەبێژی کونسوڵخانەی ئەمریکا لە هەولێر بە ئاڤا میدیای ڕاگەیاند، ئەمریکا مێژوویەکی دوور و درێژی هاوبەش و هاوکاری دیپلۆماسی لەگەڵ حکومەتی هەرێمی کوردستان هەیە، ئەمەش لەسەر بنەمای ئەولەویەت و ئاڵنگاری هاوبەش، لەوانە بەرەنگاربوونەوەی توندڕەوی و پەرەپێدانی سەقامگیری ناوچەکە.

- حکومەتێکی بەهێز و خۆڕاگری هەرێمی کوردستان پێویستە بۆ ئاسایش و سەقامگیری عێراق. داوا لە حکومەتی هەرێمی کوردستان دەکەین بە خێرایی کابینەی نوێ پێکبهێنێت.

- کۆمەڵگەی نوێی کونسوڵخانەی گشتی ئەمریکا لە هەولێر کە چاوەڕوان دەکرێت لە کۆتایی ئەمساڵدا بکرێتەوە، ڕەنگدانەوەی پابەندبوونی ئەمریکایە بە هەرێمی کوردستان.

- "داوا لە حکومەتی عێراق و کوردستان و کۆمپانیا نێودەوڵەتییەکانی بەرهەمهێنی نەوت دەکەین لەزووترین کاتدا ڕێکبکەون لەسەر کردنەوەی بۆڕی نەوتی عێراق – تورکیا".

- ئەمریکا بەردەوامە لە داکۆکیکردن لە بازرگانی و وەبەرهێنانەکانی ئەمریکا لە عێراق، "بەو پێیەی ئێمە پێمان وایە کە ژینگەیەکی بازرگانی تەندروست کە ڕێز لە گرێبەستەکان بگرێت، هاوتەریب بێت لەگەڵ ستانداردە نێودەوڵەتییەکان و ڕێگە بە گەشەسەندنی بازرگانی بدات بۆ هەمووان باشە".

- "هاوکات پشتیوانی لە هەوڵەکانی حکومەتی عێراق بە حکومەتی هەرێمی کوردستانیشەوە دەکەین بۆ چاودێریکردن و گرتنەبەری کردەوە لەدژی ئەو گرووپە تیرۆریستییانە کە ڕەنگە هەوڵی دۆزینەوەی پەناگەیەکی ئارام لە عێراق بدەن".

ئەمەش بزانە: پێشتر لە پەیوەندییەکی تەلەفۆنیدا، مارکۆ ڕوبیۆ وەزیری دەرەوەی ئەمریکا لەگەڵ سەرۆکوەزیران مەسرور بارزانی بە گرنگییەوە باسی لە هاوبەشی بەهێزی ئەمریکا و هەرێمی کوردستان لە فراوانکردنی هەلی بازرگانی و بەرەوپێشبردنی سەقامگیری ناوچەکە و بەهێزکردنی دیموکراسی کرد.