ئاڤا بەدواداچوون بۆ هۆکاری ڕاگرتنی مۆڵەتی زیندانییانی چاکسازی سلێمانی دەکات

ئاڤا نیوز

دوای ئەوەی دەنگۆی بڕیاری ڕاگرتنی مۆڵەت بە زیندانییانی چاکسازی سلێمانی بڵاوبووەوە، وەزارەتی ناوخۆ و وەزارەتی کار و کاروباری کۆمەڵایەتی لە ئاڤاوە ڕوونکردنەوە لەسەر ئەم بابەتە دەدەن.

وێنە گەورەکە: ئەمڕۆ سێشەممە، ژمارەیەک لە زیندانیانی سلێمانی دیداریان لەگەڵ کەسوکاریان هەبووە، بە وتەی زیندانییەکان لەلایەن بەرپرسانی زیندانەکەوە ڕێگرییان لێکراوە و مۆڵەتی دیتنی کەسوکاریان پێنەدراوە، پێیان وتراوە دوای هەڵهاتنی زیندانییەکەی چاکسازی سلێمانی، لەلایەن وەزیری ناوخۆوە بڕیاری ڕاگرتنی مۆڵەت و هەموو دیدارێک دراوە، داوایان لە ئاڤا کرد بەدواداچوون بۆ ئەم بابەتە بکات.

زانیاریی تایبەت: ئاڤا پەیوەندی بە وەزارەتی ناوخۆی حکومەتی هەرێمی کوردستانەوە کرد، "پێی ڕاگەیاندین کە وەزیری ناوخۆ هیچ بڕیارێکی لەم جۆرەی نەداوە، چونکە چاکسازییەکان سەر بە وەزارەتی کار و کاروباری کۆمەڵایەتین نەک وەزارەتی ناوخۆ".

لێدوانی فەرمی: ئاریان ئەحمەد، وتەبێژی وەزارەتی کار و کاروباری کۆمەڵایەتی، بە ئاڤا میدیای ڕاگەیاند: لە چاکسازی گەورانی سلێمانی زیندانییەک هەڵهاتووە، بۆیە ڕەنگە پێداچوونەوە بە ڕێنماییەکانی مۆڵەتپێدان بە زیندانییانی چاکسازییەکاندا بکەین و هەموواری بکەینەوە، بۆ ئەوەی بزانین مۆڵەت بە کێ بدرێت یان نەدرێت.

- هیچ بڕیارێکیش بۆ ڕاگرتنی مۆڵەت بە زیندانییان نەدراوە.

لەلایەکی دیکەوە: ئاڤا پەیوەندی بە چاکسازی گەورانی سلێمانییەوە کرد، ڕەتیکردەوە کە مۆڵەتی ڕاگرتبێت.