قوتابییەكی كورد پلەی یەكەم لە تاقیكردنەوەی كانگارۆی بیركاری بەدەست دەهێنێت

ئاڤا نیوز 

لە هەرێمی كوردستان و عێراق هاوشێوەی زۆرێك لە وڵاتانی جیهان پێشبڕكێ و تاقیكردنەوەی كانگارۆی بیركاری ڕێکخرا، قوتابییەكی كۆمەڵگەی بارزانیی نەمر لە هەولێر پلەی یەکەمی بەدەست هێنا.

چیرۆكی سەرەكی: ڕۆژی 12ی ئەم مانگە پێشبڕكێی نێودەوڵەتیی كانگاروی بیركاری بە بەشداریی سەدان قوتابی لە پارێزگاكانی هەرێمی كوردستان و عێراق بەڕێوەچوو. لەسەر ئاستی عێراق و كوردستان هەزار و 152 قوتابی لە زیاتر لە 20 قوتابخانە بەشدار بوون، كەنگارۆ پێشبڕكێ و تاقیكردنەوەیەكی پێشكەوتووی بیركارییە و لە ئاستی جیهان لە چەندین وڵات دەكرێت.

لێدوانی فەرمی: ئالان حەمەسەعید، وەزیری پەروەردەی هەرێمی كوردستان بە ئاڤا میدیای ڕاگەیاند: "ساڵانە بە ملیۆنان قوتابی بەشداریی لەو پێشبڕكێیەدا دەكەن، ئەمساڵ لەسەر ئاستی عێراقیش ڕێکخرا و لە زۆرینەی پارێزگاكان بەڕێوەچوو. پرسیارەكان بۆ قوتابخانەکان نێدران و چەندین قوتابی بەشدارییان تێدا كرد، قوتابیانی كوردستان لەسەر ئاستی عێراق ئاستی باشیان بەدەست هێناوە، ئامانجێكی گەورە لە پرۆسەكە هەیە و ژمارەیەك پسپۆری باڵا لە جیهان سەرپەرشتی دەكەن".

زانیاریی زیاتر: لە كۆی هەزار و 152 بەشدار بوو 53 یان قوتابیی كۆمەڵگەی پەروەردەیی بارزانیی نەمر بوون لە هەولێر، لەو ژمارەیەش 20 قوتابی لەو كۆمەڵگەیە نمرەی باشیان بەدەستهێناوە و بڕوانامەی گۆڵد و سلڤەر و بڕۆنزیان وەرگرت.

ئەوەی پێویستە بیزانیت: شنە ئاراس جەلال، قوتابیی كۆمەڵگەی پەروەردەیی بارزانیی نەمر، پلەی یەكەمی لەسەر ئاستی هەرێمی كوردستان و عێراق بەدەست هێنا.