فایلی خەڵک؛ ڕێگای بەرزترین تاڤگەی کوردستان وێرانە و داوای قیڕتاوکردنی دەکرێت

ئاڤا نیوز

ڕێگای گەیشتن بە تاڤگەی کانی بەست وێرانە و دانیشتووانی ناوچەکەش داوای قیڕتاوکردنی ڕێگاکە دەکەن کە مەوداکەی سێ کیلۆمەترە.

ئەوەی پێویستە بیزانیت: تاڤگەی کانی بەست دەکەوێتە دەڤەری باڵەکایەتیی لە سنووری قەزای چۆمان، وێڕای خراپی ڕێگای گەیشتن بەو تاڤگەیە، ساڵانە سەدان گەشتیاری ناوخۆ و بیانیی لەهەر چوار وەرزەکە سەردانی ناوچەکە دەکەن، واتا ئەگەر ڕێگەکەی چاک بکرێت و هەموو ئوتومبێلێک پێیدا بڕوات ناوچەکە لەڕووی گەشتیارییەوە دەبووژێتەوە.

زانیاریی تایبەت: دانیشتووانی ناوچەکە داوایان لە ئاڤاکردووە دەنگیان بگەیێنیت و دەڵێن، "ئێمە 50 ماڵین بەڵێنی یەکەمیان بۆ جێبەجێ کردووین و کارەبامان بۆ هاتووە، ئێستا چاوەڕێین بەڵێنەکەی تریش جێبەجێ بکەن بە قیڕکردنی ڕێگەی گەیشتن بە تاڤگەکە کە مەوداکەی سێ کیلۆمەترە، جگە لەوەی سرووشتێکی دڵڕفینی هەیە و ناوچەیەکی گەشتیارییە، لەڕووی کشتوکاڵیشەوە ناوچەیەکی بە پیتە و سەرچاوەی داهاتی هاووڵاتیانی ناوچەکەیە.

لێدوانی فەرمی: خوسرەو سادق، بەڕێوەبەری بەڕێوەبەرایەتیی چاککردنەوە و ڕێگەوبانی سۆران  دەڵێت: پێویستە خەڵکی ناوچەکە داواکارییەک پێشکەشی ئێمە بکەن، ئێمەش دەستبەجێ دەرخستەی بۆ دەکەین و بەرزی دەکەینەوە دوای وەرگرتنی ڕەزامەندی دارایی بۆ خەرجکردنی تێچووەکەی دەست بە پڕۆژەکە دەکەین.

ئەمەش بزانە: تاڤگەی کانی بەست بەرزترین تاڤگەی هەرێمی کوردستانە و بەپێی ڕێبەری شوێنە گەشتیارییەکانی سنووری پارێزگای هەولێر، بەرزییەکەی 37 مەترە، بەهۆی بەرزییەکەی، وێنەی لەسەر دراوی 50 هەزار دیناری عێراقی دراوە و لە وەرزی بەهاردا سرووشتێکی ناوازە پیشان دەدات.