وەزارەتی ناوخۆ ئەنجوومەنی لێکۆڵینەوە بۆ گرژییەکەی یاریگای نەورۆز پێکدەهێنێت

ئاڤا نیوز

وەزارەتی ناوخۆی هەرێمی کوردستان ڕایگەیاند، ئەنجومەنێکی لێکۆڵینەوە بۆ لێکۆڵینەوەکردن و دەرخستنی ڕاستییەکان لە گرژییەکەی یاری نێوان یانەی نەورۆز و زاخۆ پێکهێنراوە، داواش لە هاندەرانی وەرزشیی و هاووڵاتییان دەکات بە ڕۆحی وەرزشی و برایەتی مامەڵە بکەن کە بەشێکن لە بنەماکانی کێبڕکێی وەزرش.

چیرۆکی سەرەکی: ئەمشەو لە یارییەکی گەڕی 29ی خولی ئەستێرەکانی عێراق کە لە یاریگای نەورۆز لە شاری سلێمانی  لە نێوان یانەی وەرزشی زاخۆ و یانەی وەرزشی نەورۆز بەڕێوەچوو، گرژی دروستبوو لە نێوان هاندەرانی هەردوو یانەکە و بووە هۆی وەستاندنی یارییەکە و بە سووکی برینداربوونی ژمارەیەک هاندەر.

ڕاگەیێنراوی فەرمی: وەزارەتی ناوخۆ هەرێمی کوردستان بڵاویکردەوە، بارودۆخی نەخوازراو کۆنترۆڵکراوە و هێزەکانی پۆلیسی پارێزگای سلێمانی لە گۆڕەپانەکەن بۆ ئاساییکردنەوەی دۆخەکە و پاراستنی گیانی یاریزانان و هاندەران. بە فەرمانی وەزیری ناوخۆش ئەنجومەنێکی لێکۆڵینەوە دروستکرا و بەیانی سەردانی شوێنی ڕووداوەکە دەکات بۆ لێکۆڵینەوەکردن و دەرخستنی ڕاستییەکان.

- وەزارەتی ناوخۆ داواش لە هاندەرانی هەردوو یانە و هاووڵاتیان دەکات کە "بە رۆحی وەرزشی مامەڵە بکەن و کەناڵەکانی میدیاش هاوکار بن لە بڵاوکردنەوەی رۆحی وەرزشی و برایەتی کە بەشێکن لە بنەماکانی کێبڕکێی نێوان هەموو یانەکانی کوردستان و عێراق و وەرزش بە شێوەیەکی گشتی."