لویس ساکۆ: سوپاسی هەرێـمی کوردستان دەکەین لەسەر چەسپاندنی دیموکراسی و پێکەوەژیان

ئاڤا نیوز

 

کاردنیاڵ لویس ساکۆ، پاتریارکی کریستیانە کلدانییەکانی عێراق و جیهان ستایشی ڕۆڵی حکومەتی هەرێـمی کوردستان دەکات لەسەر پەرۆشیی بۆ بەستنی پەیوەندی و واقیعیبوون لەپێناو چەسپاندنی دیموکراسی و پتەوکردنی هاونیشتیمانیبوون و پێکەوەژیان.

 

چیرۆکی سەرەکی: لە ڕۆژانی 23-25ـی نیسانی 2025، بۆ یەکەمین جار لە هەرێمی کوردستان و لە هەولێری پایتەخت، ڕۆژی نزای نیشتمانی بەڕێوەدچێت، تا 25ـی ئەم مانگە بەردەوام دەبێت، نوێنەرانی سەرجەم پێکهاتە و لایەنەکان تێیدا بەشدارن و گوتاریان  دەبێت.

 

ڕاگەیێنراوی فەرمی: کاردنیاڵ لویس ساکۆ، پاتریارکی کریستیانە کلدانییەکانی عێراق و جیهان لە گوتارێكی لە بۆنەکەدا ڕایگەیاند: حکومەت هەمیشە پاڵپشتبووە لە نەخۆشی و نەهامەتییەکان، لەبیریش ناکەم هەرێمی کوردستان پێشوازیی لە هەزاران ئاوارەی شاری موسڵ و دەشتی نەینەوا کرد و سەردانی بەڕێز بارزانی و فرانسوا هۆلاند، سەرۆکی فەرەنسا بۆ لای ئاوارەکان لە هۆڵی ماریوسف.

 

زانیاریی زیاتر: لویس ساکۆ لە گوتارەکەیدا وتەیەکی سەرۆک بارزانی دەگێڕێتەوە و دەڵێت، "هەرگیز ئەو قسەیەی بارزانی لەبیر ناکەم و تائێستاش لەدڵی من و کریستیانەکان چەسپیوە کە ئەوکات وتی: بەهێزبن و نەترسن، بەیەکەوە دەژین و بەیەکەوەش دەمرین.

لەلایەکی دیکە:  لە بەشێکی دیکەی وتارەکەیدا لویس ساکۆ لەبارەی کۆچی دوایی پاپای ڤاتیکان قسەی کرد و گوتی، "گیان لەدەستدانی پاپا فرانسیس لەدەستدانێکی گەورەیە، خاوەن پێگەیەکی مرۆیی و ڕۆحیی گەورە بوو. سەردانەکەی بۆ عێراق و هەرێمی کوردستان لە ساڵی 2021دا لەبیرنەکراوە، لەبیرمە لە کۆتا دیدارمان وتی: عێراق لەدڵمدایە و نزا بۆ عێراق دەکەم."