یەکێتیی تۆپی پێی عێراق: ڕووداوەکەی یاریگای نەورۆز پێشێلکارییە

ئاڤا نیوز

 

یەکێتیی تۆپی پێی عێراق دەڵێت، ڕووداوەکەی یاریگای نەورۆز پێشێلکاریی بنەمای جوانی وەرزشە و هەموو هەوڵێک دەدەن تا ڕووداوی هاوشێوە دووبارە نەبێتەوە.

 

چیرۆکی سەرەکی: شەوی ڕابردوو لە یارییەکی گەڕی 29ی خولی ئەستێرەکانی عێراق کە لە یاریگای نەورۆز لە شاری سلێمانی  لە نێوان یانەی وەرزشیی زاخۆ و یانەی وەرزشیی نەورۆز بەڕێوەچوو، گرژیی دروستبوو لە نێوان هاندەرانی هەردوو یانەکە و بووە هۆی وەستاندنی یارییەکە و بە سووکی برینداربوونی ژمارەیەک هاندەر.

 

لێدوانی فەرمی: یەکێتیی تۆپی پێی عێراق لە ڕاگەیێنراوێکدا ئاماژەی بەوەشداوە، لە نزیکەوە چاودێریی ئەو ڕووداوە دەکەین کە لە یارییەکەی شەوی ڕابردووی نێوان هەردوو یانەی نەورۆز و زاخۆ ڕوویدا، ڕووداوەکە جێگەی نیگەرانییە و یەکێتی تۆپی پێ بە هەموو شێوەیەک کار دەکات تا ڕێگریی لە دووبارەبوونەوەی ڕووداوی هاوشێوە بکات.

 

زانیاریی زیاتر: لە بەشێکی دیکەی ڕاگەیێنراوەکەدا هاتووە، "چاوەڕێی ڕاپۆرتی لێکۆڵینەوەی تایبەت بە یارییەکە دەکەین، لە هەمان کاتیشدا پێشوازیی لە قەرەباڵغی و ئامادەبوونی ژمارەیەکی فراوانی هاندەران لە یاریگاکانی هەرێمی کوردستان دەکەین و وەک دیمەنێکی جوان و ڕازاوەی وەرزشی لە قەڵەمی دەدەین."