لویس ساکۆ بۆ ئاڤا: بۆ پۆستی پاپای ڤاتیکان شتێک نییە بەناوی کاندیدبوون

ئاڤا نیوز

 

پاتریارکی کلدانەکانی عێراق و جیهان ڕاگەیاند، لە ڕۆژانی داهاتوودا 136 کاردیناڵەکەی ڤاتیکان کۆدەبنەوە و پاپای نوێ بە دەنگدانی نهێنیی یەکلایی دەکەنەوە، جەختیش دەکاتەوە کە بۆ پۆستی پاپای ڤاتیکان شتێک نییە بەناوی کاندیدبوون و ئەوەی دەنگی پێویست بهێنێت، دەبێتە براوە.

 

چیرۆکی سەرەکی: ڕۆژی دووشەممە 21-4-2025، پاپا فڕانسیس، پاپای ڤاتیکان بەهۆی جەڵتەی مێشک و سستبوونی دەمارەکانی دڵی کۆچی دوایی کرد.

 

لێدوانی فەرمی: کاردیناڵ لویس ڕافایل ساکۆ، پاتریارکی کلدانەکانی عێراق و جیهان کە هاوکات یەکێکە لەوانەی وەک کاندید بۆ شوێنگرەوەی پاپای نوێی ڤاتیکان ناوی دەهێنرێت، لە لێدوانێکی تایبەتدا بە ئاڤا میدیای ڕاگەیاند، "کێشەکە چییە هەموو وڵاتێک کاردیناڵی خۆی هەیە و وڵاتەکەش باس لە پشتیوانیی و کاندیدکردنی دەکات بەڵام ئەوە هەمووی تەنیا قسەیە و دەنگدان لە ڕاستیدا بەشێوەی نهێنیی بەڕێوەدەچێت، شتێکیش نییە بەناوی کاندیدبوون بەڵام گفتوگۆ دەکرێت لەسەر تایبەتمەندیی پاپای نوێ و پاشانیش ئێمە دەنگ دەدەین".

 

زانیاریی زیاتر: بەشێکی دیکە لە قسەکانی کاردیناڵ لویس ڕافایل ساکۆ، پاتریارکی کلدانەکانی عێراق و جیهان:

 

- لە هەڵبژاردنەکەدا لیستێک دەخەنەبەردەستت بەس ناوی خۆتی تێدا نییە، ئێمە 136 کاردیناڵین کە بەشداریی دەنگدانەکە دەکەین.

- ئەوەی کە دەنگی پێویست دەبات دەبێتە براوە

- پێکەوەژیانی ئاشتیانە لە کوردستان جۆرێکی دەگمەن و ناوازەیە و چونکە کورد توانیویەتی لەڕووی یاسایی و دادوەرییەوە ڕووبەڕووی وتاریی ڕق و کینە ببێتەوە.

- کوردستان بووەتە پەناگەیەکی ئارام بۆ هەموو ئەوانەی ئاوارەبوون یان لە ناوچەکانیان دەربەدەرکراون پێشتر لوبنان وابوو، ئێستاش کوردستان.