هێمن هەورامی: ئەم ڕێوڕەسمە نیشاندانی هەڵوێستی هەرێمی کوردستانە بۆ پێکەوەژیانی پێکهاتەکان

ئاڤا نیوز

 

هێمن هەورامی، ئەندامی مەکتەبی سیاسیی پارتی دیموکراتی کوردستان لە ڕۆژی نزای نیشتمانیی ڕایدەگەیێنێ، بەڕێوەچوونی ئەم ڕێوڕەسمە [ ڕۆژی نزای نیشتمانی] نیشاندانی هەڵوێستی هەرێمی کوردستانە بۆ پێکەوەژیانی پێکهاتەکان .

 

چیرۆکی سەرەکی: ئەمڕۆ چوارشەممە، ڕێککەوتی 23ـی 4ـی 2025، بۆ یەکەمجار ڕۆژی نزای نیشتمانی بە بەشداری سەرۆک بارزانی و سەدان بەرپرس و نوێنەری وڵاتان و کەسایەتیی و پیاوانی ئایینی لە هەولێر بەڕێوەچوو. بڕیاریشە بۆ ماوەی سێ ڕۆژ بەردەوام بێت.

 

لێدوانی فەرمی: هێمن هەورامی، ئەندامی مەکتەبی سیاسیی پارتی دیموکراتی کوردستان ڕایگەیاند: جێگای شانازییە ئەمڕۆ هەموومان لێرە کۆبووینەتەوە بۆ نزاکردن لە ڕۆژی نزای نیشتمانی لە کوردستان کە هەموو سنوورەکان دەبڕێت. ئەم کۆبوونەوەیە تەنیا بۆ ڕێزگرتن لە ڕێوڕەسمەکە نییە، بەڵکو ئەوە نیشاندانی هەڵوێستی هەرێمی کوردستانە بۆ پێکەوەژیانی پێکهاتەکان.

 

زانیاریی زیاتر: هێمن هەورامی لە بەشێکی دیکەی وتارەکەیدا لە ڕۆژی نزای نیشتمانی گوتی، "بەهێزی لەوەدایە توانامان هەبێت و تواناکان لەخۆ بگرین بەبێ ئەوەی ترسمان هەبێت، لەسەر بنچینەی ڕێزگرتن و سازان، ئێمە بە شانازییەوە ئەمڕۆ نزا دەکەین کە هەر لە یەکێتی و یەکگرتندا بین.

 

ئەوەی پێویستە بیزانیت: "گەلی کورد بەدرێژایی مێژوو قوربانی داوە بۆ گەیشتن بە بەها و ئامانجە مەزنەکان، بۆیە ئێستا ئێمە بە هێزەوە لەگەڵ نەوەکانی داهاتوو دەردەکەوین". هێمن هەورامی وادەڵێت.