شاندێكی دەم پارتی لە هەولێرە

ئاڤا نیوز

شاندێكی دەم پارتی لە هەولێرەوە سوپاسی هەوڵ و كۆششەكانی سەرۆك بارزانی دەكەن بۆ سەرخستنی پرۆسەی ئاشتی لە توركیا، دووپاتیشی دەكەنەوە ئاشتی لەبەرژەوەندی تەواوی گەلانی توركیایە.

چیرۆكی سەرەكی: شاندێكی پەرلەمانتارانی دەم پارتی بە سەرۆكایەتی پەرلەمانتار 'میراڵ دانش بێشتاش'، سەردانی هەولێریان كرد و لەدیوانی پارێزگای هەولێر لەلایەن ئومێد خۆشناو، پێشوازییان لێكرا.

ڕاگەیێنراوی فەرمی: بەپێی ڕاگەیێنراوی پارێزگای هەولێر، شاندی میوان خۆشحاڵی خۆیان بە سەردانەكەیان بۆ هەولێری پایتەختی كوردستان و ئەو ئارامی و ئاسایش و ئاوەدانییەی لە شارەكە هەیە، نیشاندا.

لێدوانی فەرمی: ئومێد خۆشناو، پارێزگاری هەولێر، لەم دیدارەدا پشتیوانی حكومەتی هەرێمی كوردستانی بۆ پرۆسەی ئاشتی لە توركیا دووپات كردەوە و جەختی لە پەیامێكی سەرۆك بارزانی كردەوە كە شەڕ هیچ شتێك چارەسەر ناكات و نابێت هیچ دەرفەتێك بۆ ئاشتی لە توركیا لەدەست بدرێت.

- هیوای چاكبوونەوەشی بۆ هەریەک لە سیاسەتمداران (ئەحمەد تورک و سڕی سورەیا ئوندەر) خواست کە ماوەى چەند ڕۆژێکە بەهۆى تێكچوونی دۆخی تەندروستییان، لە نەخۆشخانە لەژێر چارەسەرى پزیشکی دان.

لەلایەكی دیكەوە: شاندی دەم پارتی لەم دیدارەدا سوپاسى هەوڵ و کۆشش و پاڵپشتیى "سەرۆک بارزانی"ـیان کرد بۆ پرۆسەى ئاشتى لە تورکیا و دووپاتیان کردەوە کە ئاشتى لە بەرژوەندیى تەواوى گەلانى تورکیادایە و گەلى کورد خوازیارى ئاشتى و چارەسەرى ئاشتیانەیە.